220 000 statlege kroner til Oseana

8,7 millionar kroner kjem i tilskot frå kulturdepartementet til kulturinstitusjonar i Hordaland fortel stortingsrepresentantane Helge Andre Njåstad (Frp) og Ove Trellevik (H) i ei pressemelding.

– Det er positivt for kulturlivet i Hordaland at staten går inn og forsterkar der også private bidreg, seier Njåstad.

– Denne ordninga er noko regjeringa innførte i 2014 og har som hensikt å gjera kulturlivet sterkare, meir uavhengig og sikra maktspreiing, supplerar Trellevik.

Til kunstkurator og drift

15 kunst- og kulturverksemder i Hordaland nyt godt av ordninga i 2017, blant dei Oseana Kunst og kultursenter som mottek 220 000 kroner i gåveforsterking basert på pengegåver på tilsamman 880 000 kroner frå Grieg Foundation og Alutec AS.

Gåvene skal nyttast til kunstkuratorstillinga og kulturhusdrifta heiter det i tildelinga.

Museer og kulturhus som får pengegåver frå private givarar kan søkje kulturdepartementet om statleg gåveforsterking på 25 prosent. Det er satt av 51,1 millionar kroner til ordninga inneverande år. Ordninga omfatta opprinneleg museer, men blei i 2016 utvida til å omfatta fleire områder av kultursektoren mellom anna musikk, litteratur og scenekunst, visuell kunst og kulturbygg.

Dei øvrige mottakarane i Hordaland er: Teaterdrift Bergen, Bymuseet i Bergen, Granvin herad, Museumssenteret i Hordaland, Bergen Nasjonale Opera, Stiftelsen Musikkselskapet Harmonien, Nattjazz, KODE Kunstmuseene i Bergen, Stiftelsen Bergen Sjøfartsmuseum, Bergen Kunsthall, Baroniet i Rosendal, Museum Vest, Festspillene i Bergen og Vossa Jazz