Aktuelle og komande prosjekt

Det var som vanleg godt oppmøte då Os kommune ved ordførar Terje Søviknes i dag arrangerte sin årlege frukost for næringslivet i Oseana.

Ordføraren brukte, saman med prosjektleiar for blant anna Lyseparken og Liv på Øyro, Fredrik Seliussen, møtet til å orientera om E39 Svegatjørn-Rådal, ferjefri veg mellom Stord og Bergen gjennom Os, arealutvikling, sentrumsutviklng og den komande samfunnsdelen i kommuneplan for Os 2017 - 2027.

Siste del av møtet var det prosjektleiar i Os kommune Tor Inge Døsen som orienterte, med ei oppramsing av status på aktuelle prosjekt innan vatn, avlaup, bygg og planlegging.

Her er kort status for nokre av prosjekta:

• Utvidinga av Kuventræ barneskule går etter planen. Laurdag er det støyping av golv, til 17. mai skal det vera tett hus.

• I juni er det byggestart på Lysekloster barneskule, som delvis blir riven og bygd ny for 40 millionar kroner. Bygget skal vera ferdig sommaren 2015.

• På Askviknes har Os kommune no klar 19 av planlagte 30 utleigeleilegheiter. Seinare kjem 8-10 bustadtomter og ei bustadblokk.

• På Kuhnletunet skal det i oktober i år stå ferdig 12 nye bustadar for psykisk utviklingshemma.

• Den utvida delen av Kuventræ gravplass skal stå ferdig i juni i år.

• I juni blir det oppstart for nytt kryss mellom Hatvikvegen og Steinneset, der kommunen engasjerer seg saman med utbyggarar for å utbetra krysset.

• Ein ny, liten park mellom Oseana og Os Sjøfront, ut mot starten på moloen, er under bygging og skal også stå ferdig i juni 2013.

• Døsen har fått i oppgåve å temma Bjørnafjorden, å utgreia korleis innseglinga til Os hamn kan skjermast betre. «Det let seg nok gjera. Spørsmålet er kor dyrt det blir» sa Døsen på møtet.

Ny veg til Mobergslia?

Os kommune eig eigedom på Mobergslia etter Christian Michelsen, tomt det kan koma knappe 30 bustadar på.

– Dette er svært fine tomter. Nabotomta har ein privat eigar, og her kan det koma rundt 100 nye hus.

Kommunen har vore i dialog med eigaren, som har ein idé om ein ny veg til Mobergslio frå bedehuset ved Solbakken.

– Dette var ein frisk og spennande idé som vi skal drøfta vidare saman, sa Døsen.

Nye demensplassar og ny sjukeheim

Kalkylar frå rådmannen viser at det snart er like mange osingar over 70 år som det er ungar i skulealder. Os sitt folketal «veks i begge endar».

Det skal ifølgje omsorgsplanen byggast 40 til 60 nye demensplassar på Lurane.

– I år startar også arbeidet med planlegging av nok ein sjukeheim. Denne skal romma 60 plassar, som kjem i tillegg til dagens sjukeheim med 50 plassar, fortalte Tor Inge Døsen.

Vatn inn og ut

Fleire stadar i kommunen er det byggearbeid knytt til vatn og avlaup. Nytt UV-anlegg i Søvik er ferdig og nytt høgdebasseng i Askvik (bak den gamle Askeladden-fabrikken) skal stå ferdig i år.

Ny VA-leidning over Tøsdal til Nordmarka skal vera ferdig til sommaren, kommunen er også snart i mål med nytt avlaup frå Lekven til Kuhnle.

Også i Holt og Klokkargarden blir det lagt nye leidningar, så står Stegen for tur.

– Stegen har veldig dårleg VA-nett som skal totalfornyast. Dette blir eit omfattande og tidkrevjande prosjekt.

Nye krav til sikring av dammar gjer at kommunen også må i gang med kostbare prosjekt på vasskjeldene Krokavatnet og Hovlandsvatnet.