Alvorleg branntilløp i sentrum

Tysdag morgon oppdaga ein kommunalt tilsett røyk og varmeutvikling i ei blomsterpotte av isopor utanfor ein av forretningane i Os sentrum.

– Heldigvis kom ein av entreprenørane som jobbar i sentrum til og fekk sløkt det ganske raskt. Det hadde allereie utvikla sterk varme i jorda og potta var i ferd med å smelte, fortel Anne Kjersti Storebø, leiar for forebyggjande avdeling i Os Brann- og redningsvesen.

Ulmar i timesvis

Storebø er glad det gjekk bra denne gongen. Ho åtvarar samstundes mot å bruka blomsterpotter som askebeger.

– Stumper du sneipen i ei blomsterpotte kan det ligga å ulma i jorda i timesvis. Jorda utviklar ofte etterkvart ein enorm varme. Blomsterpottene står gjerne tett inntil eit hus, så tar det fyr er det fort at det spreier seg til kledningen i huset og ein får ein særs alvorleg situasjon.

Kjent problem

For brannvesenet er dette ein kjent situasjon, både i private heimar og ved institusjonar.

– Vi hadde ein tilsvarande situasjon på Luranetunet for nokre år sidan, kor det hadde utvikla seg til å bli opne flammer, men heldigvis fekk ein også den gangen sløkt flammane før dei fekk tak i husveggen, seier Storebø.