Arne og Arne med røff utstilling på Sotra

Bildeserie:

1 av 12

Årets Dra til Sjøs, som blir arrangert i Sotra Arena frå torsdag til søndag, består av to fulle hallar og over 100 utstilte båtar.

Entreen går inn i den minste hallen, som er fylt med mykje utstyr, mens den store fotballhallen har luftige utstillingar, god takhøgde og alt frå vannskuterar til seglbåtar side om side.

Den første båten du får «rett i trynet» er ein hissig, ny modell frå finske XO, selt av osingane i A K Dranges Båtservice ANS og Motor-Drange.

– XO lager røffe heilårsbåtar som er svært gode under krevjande forhold. XO 240 har selt godt hos oss dei siste åra, no har vi fått den nye modellen XO 200, som hadde verdslansering i Düssedorf førre helg, fortel Arne Falk Drange.

Samtidig som far i huset, spreke Arne K. Drange (79), går som ein løpergutt til og frå bilen med siste trykksaker og utstyr til utstillinga.

– XO 200 står her med 2 x 150 hk, men toler 2 x 200 hk. Den har V-botn på 24 gradar og med ein baug på heile 53 gradar skjærer han gjennom det som er av sjø. Der andre bygger breidde og tenker sitjeplass og rom er XO kompromisslaus på dette med eigenskapar i sjø. Den er dessutan bygd i «marine grade aluminium», heile 5 mm tjukt, og er svært robust, seier Arne junior om den navy-inspirerte båten.

Askeladden breier seg med 12 båtar

Mens Drange har fem båtar utstilt, tre XO-ar og to av merket Bayliner, står Askeladden utstilt midt i hallen med 12 modellar.

Fire av dei har snikpremiere på messa på Sotra.

• Les òg: Lanserer rekordmange fire nye båtar

– Messa i fjor, som var den første her ute, blei svært positiv for vår del. Vi hadde ei mengde kontraktar som omtrent var på høgde med dei beste åra i båtbransjen for rundt ti år sidan. Det er klart vi har høge forventingar til messa i år òg, seier Jonathan Dyrstad frå Askeladden Boats AS.

EM-vinnar lanserer båt som går i 100 knop

Andre som lanserer ny båt på messa er svenske Nitra Boats.

– Vi har bygd offshore racingbåtar i ei årrekkje, og bruker same teknologi etter at vi for tre år sidan byrja å retta oss mot fritidsbåtmarknaden med speedbåtar, seier Marcus Friberg.

Friberg køyrer sjølv aktivt og er både svensk, nordisk og europeisk meister i offshore.

– I år blir vi lansert i den norske marknaden og vi har Alvøen Marina som lokal forhandlar på Vestlandet.

Utstilt har dei Nitra 22" med 150 hk, som vil få båten opp i over 60 knop. Nitra 22 toler 200 hk. På messa i Stockholm i mars blir Nitra 29 lansert, med 2 x 400 hk og CE-godkjent for ein fart på 100 knop.

Ikkje berre nye båtar

Blant utstillarar frå Os finn vi òg Bergen Marinesenter, som kjøper og sel større, brukte båtar.

• Les òg: Sel båtar for over 100 mill i året

Han har selt båt til statsminister Solberg - og selt båten til Lothepus, men har ikkje med seg båtar ut på messa.

– Det er første gong vi stiller ut på denne måten. Vi har rundt 30 båtar for sal og føler vi får vist dei godt med prospekt og to skjermar, seier innehavar Ståle Daae Børnes.

– Her kan vi både få selt bruktbåt og få kontakt med folk som kjøper ny, som vil ha hjelp til å selja den gamle.