Avlyser Vamp-konserten

– For ein halvtime sidan ringte managementet meg for å førehandsbestilla transport.

– For fem minutt sidan ringte bandet meg sjølv for å fortelja at dei måtte avlysa, fortel Berit Steen.

Årsaka til avlysinga er dødsfall i nær familie til eit bandmedlem.

Får pengane tilbake

Vamp-konserten har vore utselt i lang tid, og Steen er svært lei seg for å skuffa ein fullsett sal.

– Men eg forstår at bandet ikkje kan gå på scenen i dag, og det trur eg publikum også gjer.

– Alle som har kjøpt billett får desse refundert, ta kontakt med oss over helga så ordnar vi det.

Vamp seier dei snart vil tilbake til Oseana, så ny sjanse kjem til å by seg om ikkje så lenge.

Restauranten held open

Mange har også bestilt middag i Oseana Restaurant og Kafé i samband med konserten.

– Restauranten held open trass i avlyst konsert. Eg håper dei som har bestilt likevel vil koma og nyta maten.

– Men vi klarer dessverre ikkje få eit reserve-band inn på kort varsel. I staden blir det noko tidlegare tilgang til lokalet for Monster, som skal rigga til Norske Talenter-audition søndag.