Avslutta vårsesongen med kvar sin 2. plass

Karoline Breivik og Kristian Breivik Gjøen køyrde i helga andre runde i vestlandsmeisterskapen.

– Dette blei ei kanonhelg for begge to! Vêret var ikkje bra, men resultata er vi veldig nøgde med, seier Karoline.

Ho køyrde seks innleiande rundar, og det gjekk betre og betre for kvar omgang.

– Vi var tre bilar i klassen, men køyrde saman med dei under 2,4 liter, så vi var totalt åtte rallycrossbilar. Eg fekk andre spor i A-finalen og enda på 2. plass.

Kristian på 3. plass samanlagt

Også Kristian køyrde seks innleiande omgangar. Han vann tre heat, fekk to andreplassar og eitt stopp då bilen ikkje ville starta.

I A-finalen fekk han tredjesporet og klatra til 2. plass.

Karoline ligg på 2. plass samanlagt av fire bilar, Kristian ligg på 3. plass av 20 deltakarar i bilcross junior.

No er det sommarferie for søsksenparet. Kristian sitt neste løp er landsfinalen på Hamar 5. august, Karoline sitt neste er NM-runden på Melhus i Trondheim 19. og 20. august.