Beviste at dei høyrer heime i 2. divisjon

Bildeserie:

1 av 3

Damelaget til Os runda i dag av serien med eit fyrverkeri av ein handballkamp, på heimebane mot Fana 2.

Os måtte vinna for å halda seg i divisjonen, samtidig måtte rivalen Bjørnar tapa for Fyllingen 2.

– Dette er så utruleg deilig. Alle viste enorm innsats og alle presterte, det blei ein skikkeleg lagtriumf, seier assistenttrenar Gitte Torp, som har leia laget dei siste månadane.

Kampen starta litt tungt, Os hamna under 1-3, hadde tre stolpeskot før pause og måtte tola tre 7-meterar imot utan sjølv å få straffe i løpet av første omgang.

Os brukte 14 minutt og 30 sekund på å ta leiinga, til pause sto det 15-10.

Samtidig låg Bjørnar under 20-8 til pause.

– Det fekk aldri jentene veta. Vi måtte framleis vinna vår kamp, og fem mål er ikkje så mykje å leia med, seier Gitte.

Men Os heldt fram trykket etter pause. Halvvegs i andre omgang leia dei med ti mål, 24-14.

Ikkje før dei to siste minutta slapp dei seg litt nedpå, likevel fekk dei også det siste målet.

Os vann 32-20, Bjørnar tapte 43-20 og Os-damene held seg i 2. divisjon.

Før kamp var Torp litt uroa for korleis jentene skulle takla kamp så tidleg på dagen, og inviterte til felles frukost før opåpvarming.

Jentene avslører oppskrifta:

– Egg og bacon og heimebakt brød!

Midtsiden kjem tilbake med kampdetaljar og bildeserie.