Bil frå Os i «Børning»

«Børning» med Anders Baasmo Christiansen, Sven Nordin, Otto Jespersen, Jenny Skavlan og Henrik Mestad i hovudrollane har blitt godt motteke etter premiera førre helg. Sundag kjem filmen på Bygdekinoen i Oseana.

– En av bilane, ein blå Mercury Couger 1968-modell, som er med i filmen kjem frå Os.

– Etter det eg har høyrd er den med i fleire av scenene, så det skal bli spennande å sjå den att, fortel Miriam Paulsen, styremedlem i Os AmCar-klubb.

Miljøet nøgd

Filmskaparane har jobba tett med motormiljøet i Noreg når dei skulle laga filmen, noko som gjer at entusiasmen er stor.

– Eg har ikkje sett filmen sjølv enno, men tilbakemeldingane frå miljøet er at det er ein knallfilm.

– Litt ekstra artig er det sjølvsagt at det er bilar vi i miljøet kjenner.

Stiller på Oseana

Då det blei klart at filmen skulle visast på haustpremiera på bygdekinoen tok medlemmar i AmCar-klubben initiativ til å stilla på Oseana.

– Vi kjem med tre bilar frå klokka 18, som folk både kan få sjå og høyra på før framsyninga.

– I tillegg til Cougeren kjem ein grå Pontiac GTO driftebil og ein mørk blå AC Cobra.

– Dersom det regnar på sundag bytar vi ut Cobra'en med ein mint-grønn Chevrolet Camaro 1981 modell, da Cobraen ikkje har tak, forklarar Miriam Paulsen.