Blei tømt av tjuvar første natt

– Dette må vera den lågaste forma for lavmål, seier dagleg leiar Endre Brenne.

Torsdag fortalte vi om korleis Os Fotball vil «skåra på retur», med nye pantekonteinarar som kan gje inntekt til både fotballen og Os Pensjonistforening.

Fredag fekk Brenne seg ei overrasking han fint kunne klart å vera utan.

– Det var kome inn over halvfulle konteinarar første dag. Då eg midt på dagen fredag skulle sjekka om dei burde tømmast var dei allereie tømt.

Vil låsa dei inn

Konteinarane er like heile, men to av dei fire har tydelegvis vore snudd på hovudet for å få ut tomflaskene.

– Det var nok rundt 200-300 kroner i pant i kvar av dei. I denne omgang er ikkje pengane det verste, men det å oppleva at slike ting ikkje får stå i fred.

– Det er utruleg skuffande at det no blir naudsynt å låsa desse inn om nettene. Litt av poenget var jo at folk kunne koma her og donera panten sin kor tid som helst på døgnet, men no blir det frå morgon til siste kamp er over og kiosken stenger.