Susanne Sperrevik, Reidun Vasby og Marianne Børhaug hos Havnechefen, som opnar om ei veke, med brødhyller av eplekassa henta i Utne i Hardanger. (Foto: Kjetil Vasby Bruarøy)

Blir Godt Brød-forhandlar

Godt Brød-suksessen kjem no til Os, hos Havnechefen, som endeleg har fått opningsdato.

Av: Kjetil Vasby Bruarøy

Menyen er sett, restauranten er prøvemøblert og i kveld skal Havnechefen testa kjøkkenet for eit privat selskap.

– Opningsdagen blir laurdag 29. april, under Vårsleppet i Os sentrum. Vi gler oss veldig, seier medeigar Susanne Sperrevik.

– Vi startar med ein liten meny med rundt seks varme rettar, både bestseljarar frå førre restaurantlokale og nye kjøtt- og fiskerettar, blant anna ein oppgradert hamburger og biff av møyr og smaksrik ytrefilet, som blir fast innslag på menyen, seier kokken Frank.

– Så vil vi utvida med om lag éin rett i veka framover mot sommaren.

«Uforskamma gode råvarer»

Førre versjon av Havnechefen bakte brød sjølv, tok imot enkelte bestillingar og vurderte å produsera opp for sal.

I Havnechefen som opnar i nybygget på Torget om ei veke blir det òg brød, påsmurt og bollar, men i hovudsak frå eit bakeri i Bergen.

– Vi jobbar framleis etter filosofien som starta det heile, god smak og godt samvit, så reine og ærlege produkt som mogleg. Sidan vi driv ekte handverk heiter bakeria våre «bakeverkstad», maten vår er i hovudsak økologisk og så kortreist som mogleg, seier Marianne Børhaug.

Frå Bergen har Godt Brød utvida til Oslo og Trondheim.

– Alle utsalsplassane våre bakte i utgangspunktet sjølv, men det siste året har vi fått nokre få utsalsplassar som ikkje baker sjølv. Då Havnechefen tok kontakt såg vi fort at dette er ein restaurantdrivar som tenkjer som oss, og vi ser fram til å få vår første forhandlar på Os.

Det var Reidun, som etter å ha ete hos Godt Brød i Bergen, tok kontakt. I utgangspunktet for å høyra om dei leverte hamburgerbrød til restaurantar, noko ho fekk positivt svar på.

Bakverk, råvarer og drikke

Godt Brød byr på ei rekkje varer, som juice, knekkebrød, frukostblanding og mjøl, som Havnechefen vil ha både som råvare på kjekkenet og for sal.

– Utvalet er stort innan både brød, bollar og drikkevarer. Fleire liker å baka sunne brød sjølv, og kan kjøpa mjølet sitt via våre forhandlarar, seier Børhaug.

Alle bollane som ikkje har eggekrem er fri for mjølk og egg, og er dermed god mat også for veganarar. Bestseljaren blant brøda er «Grovt suredeigsbrød av spelt», der 100 prosent av mjølet er ulike variantar av spelt.

Sjølv om mange er opptatt av det sunne og reine, skal det ikkje berre handla om helse.

«Laget av kortreiste og uforskammet opplagte råvarer. Mange velger oss av ren ideologi. De fleste velger oss på grunn av smaken» skriv 22 år gamle Godt Brød på sine heimesider.

– Vi ser dessutan at bollar og bakverk kan bli fint supplement til restauranten. Mange vil ha noko i forbifarten, og har ikkje tid til å setja seg ned. Kanskje dei berre vil ha noko å bita i til kaffien, eller dei har ungar som vil ut og leika ved fontene som er rigga til utanfor restauranten. Då er det greit å selja noko som er lett å ta med, seier kokken Frank.

Fleire saker

bilde-midtsiden

Iskaldt comeback

24. april 2017

Alexander Heggland har ikkje spelt Norgescup på fire år. Comebacket i helga blei ei kald oppleving.

bilde-midtsiden

Vinter i april

24. april 2017

I går kom snøen, i dag kom sola - og i neste veke skal det bli minst 10 gradar varmare.

bilde-midtsiden

Spennande song og dans på Haugland

24. april 2017

Kajsa Balto tolkar norsk folkemusikk med samiske tonar i Studio E39. Kristine Nilsen Oma kjem med spesiell danseframsyning.

bilde-midtsiden

Alle vil feira 70-åringen

23. april 2017

MS Midthordland fyller 70 år i år. Kommunane Samnanger, Fusa, Tysnes og Os vil ha cruise for å feira «Dronninga av Bjørnafjorden».

bilde-midtsiden

Dyr køyring i sentrum

23. april 2017

Fekk 5350 kroner i forenkla forelegg for å køyre i sentrum natterstid. Mann herpa biler og var valdsam.