Blir ikkje stengt

Onsdag skreiv vi om problem med inneklimaet på Os Gymnas, som er under oppussing.

Les òg: – Fleire har blitt sjuke

I dag var HMT-seksjonen i Hordaland fylkeskommune på gymnaset for å ta prøvar av luftkvaliteten.

– No skal eg skriva ein rapport og senda den til rektor, så får vi ta det derfrå, seier Bjørn-Atle Mikkelsen frå Hordaland fylkeskommune.

Det var han som tok prøvane på gymnaset i dag. Mikkelsen ville ikkje seia meir om kva rapporten kom til å innehalda.

– Men gymaset er framleis ope?

– Ja. Skulen blir ikkje stengt. Men eg kjem til å foreslå ei rekkje tiltak for å betra inneklimaet.

Leiar for HMT-seksjonen, Ruth Brudvik, har vore i møte i dag og hadde ikkje fått snakka med Mikkelsen då Midtsiden tok kontakt torsdag ettermiddag, og kunne ikkje seia meir om saka.

Enkelte kommentarar til førre artikkel om gymnaset fortel om stopp i arbeidet i dag, og mykje lufting "for å betra på resultatet".

Kor stor grad dette har hatt innverknad på prøvane, veit vi ikkje. Men påstandane blir stadfesta av fire elevar Midtsiden snakka med torsdag ettermiddag.

– Det var veldig kaldt på skulen i dag, og rett før han som tok prøvane kom var det ekstra med lufting, seier dei.

– Vi er spent på resultatet på prøvane, men fryktar at resultata ikkje er betre enn det som er reelt, sånn som det blei lufta ut i dag.

Rektor Trond Eikeland avviser påstandane.

– Vi luftar etter kvar time, det har vi gjort kvar dag dei siste vekene.

– Få av dei tilsette som var på skulen i dag visste at kontrolløren kom, og dei visste i alle fall ikkje kor tid på dagen han ville dukka opp, seier Eikeland.