To bøtter gull

Tradisjonen tru la rådmannen fram sitt forslag til korleis kommunen skal nytta sine midlar for komande år på kommunestyret sitt oktobermøte. Det blei eit historisk godt budsjett han kunne presentera.

– Dobbel regnboge over Os gir to bøtter med gull, opna rådmannen presentasjonen med.

Han la fram eit budsjett med ei auke i nettodriftsramme på 8,5 prosent.

– Det ligg inne ein betydeleg pengesum til styrking av tenestene.

– Vi har òg budsjettert med budsjettoverskot i heile økonomiperioden, fortalte ein smilande Knut Terje Rekve.

Nær ein milliard i drift

Brutto driftsramme for 2015 er på 1.167.405.000 kroner og ei netto driftsramme til fordeling på 922.182.000 kroner.

– Budsjettert resultatgrad er i 2015 på 2,27 prosent med 194,0 millionar i låneopptak til investeringar, fortalde rådmannen.

Ny gymsal/kulturbygg på ungdomsskulen

Som vekstkommune og med gode resultat for 2014 legg rådmannen opp til større investeringar i økonomiperioden fram mot 2018.

Dette er blant tinga rådmannen har funne plass til:

• Utbygging av Luranetunet omsorgsenter
• Utviding av Os idrettspark Kuventræ med ny dobbel fleirbrukshall, friidrettsanlegg og omgjering av naturgrasbane til kunstgrasbane
• Kraftig satsing på utvikling av Os sentrum i form av ny infrastruktur og tomtekjøp, herunder planlagt gymsal/kulturbygg på Os ungdomsskule
• Opprusting av Lysekloster skule og midlar til ny skule i Os
• Midlar til 5 nye klassar i grunnskulen frå 2015
• Styrking av eldreomsorga med fire nye årsverk i open omsorg
• Styrking av bemanning til PU med 2 stillingar
• Auka kommunalt vedlikehald (stilling og driftsmidlar)
• Styrka førebyggande helsetenster med oppretting av ny stilling som helsesøster
• Ny fastlegeheimel
• Auka brannberedskap i form av ny stilling og nytt utstyr (høgdeberedskap)

Midtsiden kjem tilbake onsdag med fleire detaljar frå rådmannen sitt budsjettframlegg