Brannfarleg lekkasje på Halhjem

Klokka 01.14 natt til tysdag fekk Os brannvesen melding frå mannskapet på MF Fanafjord.

– Det rann væske ut av hengaren på eit umerkt vogntog. Ferja snudde og sendte traileren på land igjen på Halhjem, fortel varabrannsjef Arne Monsen.

Brannfarleg og helseskadeleg

Då brannvesenet kom fram såg dei at lekkasjen var frå lasta, men føraren av vogntoget visste ikkje kva det var.

– Det viste seg at han hadde ei palle med lynol i hengaren, 16 spann med 25 liter i kvar.

Lynol er svært brannfarleg og inneheld dei helseskadelege løysemidlane toluen og butylacetat.

Sperra av området

Eit område rundt hengaren blei sperra av og brannvesenet fekk lynolen over på to oljefat.

Politiet var ikkje på plassen så Monsen noterte personalia på føraren, ein mann frå Polen, som hekta av hengaren og kjørte vidare til Stavanger utan.

– Hengaren står igjen, men blir tatt hand om av Bring i dag. Politiet følgjer opp føraren og det norske selskapet han kjører for, seier varabrannsjefen.