Brygga er ledig for hyttefolket

– Den eine båten har lagt der i minst eit år, og no etter orkanen «Nina» er kaien rett og slett full, fortalte ein hytteeigar som kontakta Midtsiden-redaksjonen i starten på mars.

Les òg: Alle desse ligg ulovleg

Ho og andre har bruk for gjestebrygga ved Halhjem ferjekai for henting av gjestar og varer, men kom rett og slett ikkje til land i vinter.

Alle er fjerna

Rolf Nordeide hos Statens vegvesen sa han kjenner til problemet, og at det blei gjort tiltak for å få båtane vekk.

Etter at Midtsiden omtalte saka tok to av båteigarane kontakt og sa at dei ville fjerna båten sin. Minst éin av dei hadda hatt havari.

No er alle båtane fjerna og hyttefolket og andre har full tilgang til kortvarig bruk av kaien.

Flytta problemet

Os brannvesen, som både har ansvar for Os hamn og har sin eigen båt liggande ved gjestebrygga på Halhjem, seier dei ikkje har tatt ei aktiv rolle for å få båtane fjerna.

– Her har nok båteigarane sjølv tatt tak. Men ein av dei har dessverre berre flytta båten sin inn til Os hamn, der vedkomande tidlegare låg ulovleg i lang tid før den blei fjerna, seier hamnesjef Gitle Smaadal.

– På veg til Os skal den visst ha havarert utanfor Ferstad og gjort noko skade på ei brygge.

Smaadal har prøvd å få kontakt med båteigar for å få denne vekk frå Os hamn igjen.