Budsjettdebatt blei valkamp

Sjølv om endel av innbyggjarane tykkjer det kanskje er litt vel tidleg å byrja valkampen fram mot kommunevalet hausten 2015 allereie i desember, så var det nettopp dette Glenn Erik Haugland (v) gjorde då han fortelje om venstre sitt syn på ståa i kommunen.

– Til neste år blir det eit maktskifte i Os. Då skal vi hjelpa Søviknes ned i salen, tordna Haugland i opninga av innlegget sitt før han fortsatte;

– Os har vekst, det klarar ikkje den noverande leiinga å forhalde seg til.

– Etter 16 år i leiinga er Søviknes og posisjonen trøytte, meinte Haugland som siterte delar av Bjørn Eidsvåg si tekst "Eg ser", før han presenterte det han sjølv beskreiv som eit taktskifte for Os.

– Sentrumsalliansen (V/Tvs/KrF/Sp) har ein politikk som vil klara veksten.

– Våre viktigste ressursar er born og unge. Vi må sørgje for at dei svakaste elevane får den merksemda dei fortener og at dei gode lærarane får moglegheiten til å gjera jobben sin, argumenterte Haugland som òg angrip Søviknes og Gustav Bahus (Frp) for ikkje å halde det dei lovar, med referanse til gang- og sykkelveg langs Hatvikvegen i samband med utbygginga på Bjånes.

Reagerte på kommentarane

Innlegget til Haugland, fekk Eirik André Hesthamar (Frp) til å ta ein replikk.

– Eg reagerar på nokre av kommentarane dine som er retta rett mot ordføraren.

– Når det gjeld taktskiftet du refererar til så har vi dei same tinga i vårt framlegg, påpeika Hesthamar før han ramsa opp punkta som var like.

– Det siste taktomslaget du peiker på er satsing i skulen. Vi styrkar satsinga på DUÅ (Dei utruleg åra, journ.mrk). Det er det avdelinga har beden om, kommenterte Hesthamar.

– Styrkinga av PPT er adskillig større hos oss enn Frp/H, svara Haugland til det siste.

– Overhode Ikkje trøytt

Heller ikkje Søviknes kunne la invitasjonen frå Haugland om å starta valkampen tidleg ligga.

– Eg kan betrygga Haugland om at eg overhode ikkje er trøytt.

– Det vil eg bevisa i dei neste ni og ein halv månad fram mot valet.

– Eit reellt demokrat handlar om å skapa konkrete resultat.

– H/Frp har fått styra i 16 år, ja det er lenge, men det er gode grunnar til at osingane har gitt oss tillit når ein ser resultata.

– Vi klarer å halde ord, sjølv om ein av og til må justera seg.

– Eg trur det skal vera mogleg å realisera det opprinnelege Hatvikveg-vedtaket innan 10 år. I påvente av det er løysinga med Midtbøvegen med dei tiltaka som er planlagt der ei god løysing, svara Søviknes om anklagane om å ha snudd i Bjånes-saka.

– Skil tre millionar

Søviknes peika òg på at skilnaden mellom sentrumsalliansen sitt budsjettframlegg og Frp/H sitt var på 3 millionar kroner.

– Tre millionar er mykje penger, men sett i forhold til totaliteten til oppvekst- og kultur, så snakkar vi om promiller.

– Då blir det vanskeleg å sjå at det er snakk om det store linjeskiftet, argumenterte Søviknes.