Elv over veg

Torsdag blei Øvredalsvegen stengt på ubestemt tid grunna frykt for fleire snøras. Dei som bur i starten av vegen, i Lønningdal, er ikkje blant dei som er isolert. Men ei stund torsdag ettermiddag kom heller ikkje dei seg av flekken.

- Det skjedde brått. Eg kom heim igjen etter ein tur til sjøen då vatnet fossa imot meg - midt i vegen. På det verste vassa eg til låret i vatn, fortel Aase Lønningdal.

Elva som kjem ned frå Rødsfjellet renn vanlegvis under Øvredalsvegen, men i går var det ikkje plass til heile elva.

- Elva var stor og holet under vegen delvis sperra av snø. Bilane kunne vi gløyma å bruka, det var altfor djupt vatn i vegen, seier Aase.

Etter ei stund kom både folk frå nabolaget og brøytemannskap frå Os kommune til staden for å grava opp opning til elva.