Førebels utan løyve

Monica Flaterås og sambuaren Nils Eivind Søfteland var i førre veke klar for å arrangera autoslalåm på Ulvenvatnet. Men så viste det seg at løyvet kommunen hadde gjeve ikkje var gyldig, slike løyvesøknadar må opp til politisk handsaming.

- Vi har sendt ein ny, fyldig søknad, både for i år og neste år, seier initiativtakar og motorsportutøvar Nils Eivind Søfteland.

Fekk ikkje tid
Grunna vanskelege økonomiske forhold i Os kommune var det tysdag eit ekstraordinært møte i formannskapet. Ordførar Terje Søviknes sa før helga at det kunne bli aktuelt å sjå på søknaden, men tysdag ettermiddag kunne han opplysa om at det ikkje hadde blitt tid til dette.

- No vil vi kontakta kommunen og sikra oss at søknaden er innhaldsrik nok, slik at når dei ein gong får tid til å sjå på den, så skal alt dei treng for å ta ei avgjerd vera der.

Stort behov
Søfteland fortel at han har inntrykk av at behovet for å driva motorsport er stort i Os. Telefonen hans har ikkje stått etter at planane hans blei kjent.

- Dei arrangerte to løp i Norheimsund i fjor, men ingen i år. Det er synd at vi som har denne interessa må til Gol eller Sigdal for å kjøra, synes han.

Trygge rammer - også for 16-åringar
Monica Flaterås er leiar for NAF Motorsport i Bergen. Ho fortel at arrangementet dei har planar for vil bli arrangert etter klare retningslinjer frå Norges Bilsport Forbud, NBF.

- Det inkluderer blant anna førarmøte i forkant, eige møte med kjøretips til nye sjåførar og kjøring utan passasjerar.

- Dei einaste som har passasjerar er dei som er mellom 16 og 18 år, dei må ha med ein vaksen.

Kjegler, ikkje kappkjøring
Under bilda kan du sjå ein filmsnutt frå Hebbes Racing i Sigdal. Dette er banekjøring, ikkje autoslalåm, som osingane vil arrangera.

- Det er ikkje snakk om kappkjøring rundt og rundt på bane, autoslalåm er kjøring mellom kjegler på tid, ein og ein på banen. Dei to beste av tre rundar er teljande, forklarar Flaterås.

- Dette er sikkert underhaldande, men framfor alt er det nyttig trening og erfaring med glattkjøring. Vi held også på å sjå etter alternative område for kjøring, på land.