Frå 14-32 til 32-25

Før tredje siste kamp for sesongen var det framleis teoretiske sjansar for nedrykk for Os-damene, som i vinter blei frådømt heile fire poeng grunna ein bagatell. Men heimekampen mot Bjørnar 2 blei mykje betre enn bortekampen mot damelaget frå klubben dei samarbeider med på jentenivå, og Os er no sikra plass i 2. divisjon også neste sesong.

- No er vi heilt sikra plass, etter ein fin kamp der vi klarer oss godt sjølv om både kaptein Madeleine Hjertnes, Mona Stigen og Astrid Nybø er ute med skade, seier Erlend Lyssand.

Lyssand var lagleiar i Kenneth Husebø sitt fråvær, og har tydelegvis også klart seg bra. Os vann 32-25 etter å ha leia 14-10 til pause.

Takkar Tonje
Tonje Hjertnes er ikkje blant dei som skårar flest mål for Os, men ho brukar mykje krefter på rett måte i forsvar.

- Forsvar er 70 prosent av kampen, og i framskoten posisjon i 5-1-forsvar er Tonje fantastisk. Det var ho også i går, meiner Erlend.

Tonje gjorde det vanskeleg for angrepsrekka til Bjørnar 2, og Vibeke Ingebrigtsen i Os-målet var stødig på dei ballane som kom forbi forsvaret.

Ingvill leika seg
I kaptein og playmaker Madde sitt fråvær var Ingvill Hefte god å ha.

- Etter ein tung periode med skade i ryggen ser Ingvill ut til å vera tilbake for fullt. Ho gjorde det veldig godt på Madeleine sin plass og skåra like mange spelemål som toppskårar Irene.

Os - Bjørnar 32 - 25 (14 - 10)
Os sitt lag (skåringar i parantes): Anne Lene Tysseland, Malin Hjelle Berentsen, Tonje Hjertnes, Emilie Hjertnes (2), Maria Stangeland Lunde (4), Hilde Kristine Røttingen (6), Ingvill Hefte (7), Vibeke Ingebrigtsen, Elise Hjelle (1), Trine Balland (2), Irene Tangerås (10, 3 av dei på straffe)

SJÅ TABELL

Laurdag 20. mars spelar handballdamene til Os sesongens siste heimekamp, mot Årstad 2 klokka 16.30. Sesongen blir avslutta med bortekamp mot Sotra 27. mars.