Torsdag kveld reiste dei vekk, laurdag morgon oppdaga slektningar at soveromsvindauget deira sto på halv åtte.
- Det skal ha sett fint ut i går, så innbrotet har truleg skjedd natt til laurdag eller laurdag morgon, seier paret som bur i huset på telefon til Midtsiden.no.
På jakt etter medikament?
Midtsiden var i formiddag i huset saman med politiet. Det er spor etter mykje leiting i bustaden. Klesskap er tømt og skuffer stå opne. Samstundes ser det ut som om all elektronikk har fått stå i fred. TV-en heng på veggen og ein iPod står framleis i dockingstasjonen sin midt i stova.
- Kva som er tatt er ikkje så nøye, det at folk har vore i huset vårt er ekkelt uansett, meiner kvinna i familien.
- Dei kan ha vore på jakt etter rusmidlar, sølvtøy eller smykker. Skuffer og skap på soverom, bad og kjøkken er rota til, og det ligg mange smykker utover senga, seier politibetjent Steinar Flagtvedt.
Førebels er det uvisst om noko er stole i huset.
Kom bakfrå
I snøen rundt huset er det lett å sjå kvar tjuvane har kome frå.
- Det er spor ned ein bratt bakke frå baksida av huset. Dei har tatt seg inn ved å bryta opp soveromsvindauget og ut gjennom ei terrassedør frå stova, fortel Flagtvedt.
Det er spor etter to menn og eit dyr. Dei kan ha hatt med seg ein hund, men dyrespora kan også ha kome seinare eller før. Spora etter dei to personane går vidare til neste hus, men ingen av naboane skal ha hatt innbrot i natt.
Politiet er interessert i tips, og kan treffast på 56303900/48002480.
