- Kva med våre tak?

Onsdag i førre veke gjekk Os kommune ved teknisk sjef Haldor Fosse ut med åtvaring; folk blei oppfordra til å sjekka snømengda på hustaka og bestilla fagfolk til moking om naudsynt.

Den same ettermiddagen sto osingar side om side og moka taka sine, Bohus stengte grunna skade på tak som følgje av store snømengder og fleire idrettsanlegg stengte før helga for å vera på den sikre sida.

Men kva med kommunale bygningar, blir dei moka for snø?

- Vi har organisert moking på fleire skular. Lysekloster er tatt og Nore Neset skule blir rydda for snø i dag. Fleire står for tur no i vinterferien, seier Haldor Fosse.

Bustadar må venta
Store tak blir prioriterte først. Kommunen eig også fleire bustadar, skal desse også bli moka?

- Vi bur i kommunal bustad i Skorvatjørno, og har bedt kommunen å bestilla moking. Men dei meinte det var trygt her, skriv ein Midtsiden-lesar i ein epost til redaksjonen.

- Vi har førebels ikkje planar om å moka bustadane. Vanlege, skrå hustak skal tåla snøen som ligg på taka no, seier Fosse.

- Når kommunen ber andre sjekka taka sine, og husa vi bur i er eldre enn dei det blir anbefalt å moka, så synes vi det er rart at ikkje taka våre òg blir rydda for snø.

- Vi held eit auge med bustadane og vêrmeldingane, blir det vêromslag og regn vil vi setja i verk storstilt rydding der det er behov, lovar teknisk sjef.

Ein halv million ekstra
To og ein halv månad med vinter og fleire store snøfall har kosta kommunen.

- Det var mykje brøyting i fjor også, men det som er spesielt i år er at vi har så mykje snø at den må kjørast vekk. Det vi held på med no, å lasta snø på store bilar for å dumpa den andre stadar, kostar mykje, seier Haldor Fosse.

Han har førebels ikkje rekna saman kva rekordvinteren har kosta, men trur kommunen til no har brukt rundt 500.000 kroner meir på snørydding enn kva som ligg i budsjettet.