Lesarar på tur: Midtsiden.no inviterer deg til å dela dine reiseopplevingar med andre lesarar.
Anten du har hatt ein tur til Geilo eller Kreta, til Island eller Thailand, er du velkomen til å senda oss dine erfaringar og bilde. Les meir om dette her.

Vi kjem med reiserapportar frå surfetur til Danmark, strandliv i Barcelona, landsbyliv i Brasil, storbyferie i Roma og safari i Afrika. Først ut som «Lesar på tur» er Stein Ove Halhjem, som saman med andre osingar tok seg til toppen av Kilimanjaro, Afrikas høgaste fjell, i desember i fjor.

På toppen av Afrika

Det skal vera 150 til 200 år sidan Kilimanjaro, Afrikas høgaste fjell (5.895 moh) var ein aktiv vulkan. I dag er den inaktiv, men ikkje utdøydd. Gassar kjem framleis opp frå toppen av Kibo, målet for mange som tar turen til området nordaust i Tanzania.

- Under halvparten av dei som prøver når toppen. I laget som kom etter oss var det berre ein av tre som klarte det, fortel Stein Ove Halhjem.

SJÅ FLEIRE BILDE FRÅ TUREN NEDERST I ARTIKKELEN

Sendte broren i hardtrening
Direktøren for Vestfjell AS ville prøva noko anna, ein liten ferie frå det ravle A4-livet, og såg seg ut Kilimanjaro som reismål og utfordring.

- Eg skulle gjerne hatt kona med, men ho har dårlege kne, så då spurte eg storebror min Arne. Han meinte at han ikkje var i god nok form, men då eg sa at han hadde eit år på seg gjekk han rett i hardtrening.

Tur frå Traa
Halhjem har følgt med på Jarle Traa, den kjente klatraren og ekspedisjonsleiaren som blei endå meir kjent då han overlevde 70 timar i dødssona på Mount Everest.

- Vi bestilte tur hos Traa, og det var han som heldt informasjonsmøtet med oss før avreise. Han skulle også vera guiden vår, men ei jente frå Trøndelag, Anna, steppa inn.

Møtte Døsen på Flesland
Før avreise hadde brørne Halhjem høyrt rykte om at det var fleire osingar som skulle vera med på same tur, og på Flesland møtte dei ekteparet Inger og Arne Døsen.

- Eg har drøymt om ein tur til Kilimanjaro i mange år, og no hadde vi funne ut at det var på tide. Vi skulle eigentleg reisa i januar, men så blei turen slått saman med desemberavreisa, seier Arne Døsen.

Kos i campen
Dei fire osingane hadde selskap av eit par frå Hemsedal, og den vesle gruppa på sju nordmenn, inkludert guiden, starta turen første morgon etter ankomst.

- Men vi gjekk ikkje heilt åleine, vi hadde 29 bærarar med oss. Det verka råflott, men slik var opplegget.

Nordmennene gjekk med tursekkar medan dei innfødde sprang i forkant med 20 kg kvar på ryggen.

- Då vi kom fram til ny camp hadde dei allereie sett opp telt og lagd klar mat. Vi overnatta i tomannstelt, men om kvelden sat vi samla i sjumannstelt.

- Vi var heldige som reiste med ei lita gruppe, desse stundene i teltet var veldig hyggelege, synes Stein Ove.

Regn, snø, skodde og høgdesjuke
Vêret kan vera ustabilt i denne delen av Afrika. Morgonen er flott, men frå 9-10 av veit du aldri kva som skjer.

- Vi opplevde både solskin, regn, skodde og snø. Nokre av oss reagerte også med litt hovudverk og kvalme då vi kom i høgda, men det var ikkje noko å gjera med.

- Men vi var veldig samla i gruppa, om målet og toppen. Alle skulle opp, og eg og Døsen var mest ivrige, eg trur vi hadde fått oss kvar sin porsjon med deprisjon om ikkje vi hadde klart det.

Gjekk heile natta
Målet var å nå toppen om morgonen, for å få med seg den flotte soloppgangen frå toppen av Afrika.

- Vi gjekk store delar av dagen før vi tok fire timar pause. Så byrja vi å gå igjen i 22-tida om kvelden, og gjekk heile natta mot toppen. 7. desember klokka 06.15 var vi der, i 20 minusgradar, på 5.895 meters høgde. Det var ei god kjensle!

Etter å ha klatra 1100 høgdemeter var det nok med 15 minutt på toppen. Så bar det nedover igjen.

- Eg trur metoden til Traa er ein viktig årsak til at han får så mange til toppen. Før siste etappe var vi tre dagar på tilvenning til høgda, på rundt 4000 meter over havet. Herfrå gjekk vi opp 500-600 meter, så ned igjen til teltet. «Gå høgt, søv lågt», som klatrarane seier.

Safari, badeferie - og meirsmak
Etter to dagar var gruppa nede igjen på 1800 meter, der turen starta. Så venta to dagar med safari. Etter å ha sett blant anna løve, gnu, giraff, geoard og neshorn reiste dei fleste heim.

- Eg og Inger reiste til Zanzibar og fekk oss fire dagar med bading og avslapping før vi reiste heim for å førebu oss på julefeiring, fortel Arne.

Både Halhjem og Døsen trur det kan bli fleire aktive feriar i framtida.

- No er det ein del norske toppar eg ikkje har vore på, men det er også fleire utanlandske fjellturar som kan bli aktuell. Det er kanskje ikkje så lenge til eg prøver å koma meg høgare enn 6000 meter over havskorpa, seier Stein Ove Halhjem.

Fakta om turen
Avreise: 1. desember 2009
Tilbake i Os 12. desember
Reiserute: Bergen-Amsterdam-Kilimanjaro
Førebuing og tips: Hugs vaksine og visum. Du bør vera i grei form og vant med å gå i fjellet. Når gjeld pakking og klede er ikkje det nest beste godt nok, du skal bevega deg frå shorts og varme til skodde, snø og kulde. Ta med humor og sosiale antenner, gruppa bur tett.
Pris: Cirka 35.000 kroner. Då er det meste inkludert.

Eksterne lenkjer:
Referat frå turen, jarletraa.no
Kilimanjaro på Wikipedia