- Den førre kampen tapte vi på slurv, i går hadde vi rett og slett ikkje meir å gje, seier trenar Leif Idar Røen.
Os tok ein knapp siger over BSI heime i haust, med veteranane Erlend Lyssand og Kenneth Husebø på laget. Måndag blei det firemålstap på bortebane.
Kjempa hardt mot god høgreback
BSI kjørte eit høgt tempo, og hadde ifølgje Røen ein knallgod høgreback.
- Det gjorde at vi måtte legga om forsvaret til 5-1, med frimerke på denne motspelaren. Toppskårar Jørgen Wold fekk oppgåva og brukte sjølvsagt mykje krefter på dette.
Wold fekk delvis sett motspelaren ut av drift samstundes som han skåra 9 mål. Mot slutten av kampen minka det på kreftene, så då blei ikkje angrepa og skota like gode.
Os klarte 15-14 til pause, og leia i periodar, men tapte 31-27.
- Vi har ein del ute med skade og hadde berre to innbytarar med. Ein av dei var ikkje heilt i form så då blei det ekstra mykje på kvar spelar. Når stallen er så tynn som den er no så får vi ikkje alltid spelt det spelet vi ønskjer.
Jamn avdeling
Det har blitt ein del stang ut for Os den siste tida. Sjølv om dei har gått ned ein divisjon frå i fjor ligg dei no på 6. plass blant dei 10 laga i avdelinga.
Samstundes har Os éin kamp mindre spelt enn ein del andre lag og ligg berre 1 poeng frå 4. plassen og 6 poeng bak Nornen 2 på 1. plass.
- Vi ligg nok der vi høyrer heime, midt på tabellen, men vi skal halda fram med å kjempa hardt mot kvar einaste motstandar utover vårsesongen, lovar Røen.
Os sitt lag: Einar Godø, Charles Whiteley, Stian Hjertholm 2, Ove Lyssand 5, Joakim Blostrupmoen 2, Erik Vågen, Jørgen Wold 9, Fredrik Andresen 3, Kristian Bruarøy 6, Øystein Vindenes.
Os spelar også neste kamp på bortebane, mot serieleiar Nornen 2 16. februar. Neste heimekamp går mot Florø laurdag 27. februar.
