Tok GHB-produsent

Politiet i Os har i lengre tid drive systematisk etterforsking for å bremsa omsetnaden av GHB i bygda. Fredag gjekk dei til aksjon hos ein bergensar i 20-åra.

- Saman med politiet i Bergen pågreip vi mannen og ransakte husværet hans, fortel politiførstebetjent Audun Hadler-Olsen.

Sikra bevis
Mannen blei dimittert etter avhøyr laurdag. Politiet har sikra fleire bevis i saka.

- Vi fann GHB, men vi har også tatt beslag i ein del anna, blant anna PC-en hans.

Om dei fann ingrediensar til å produsera GHB vil politiet førebels ikkje ut med.

Viktig aktør
Os lensmannskontor kjenner til at det også har blitt produsert GHB i Os, men ser på aksjonen i Bergen som ein viktig del av arbeidet med å bremsa omsetnaden.

- Vi mistenker mannen for å ha selt GHB til mange i Os, og håpar at vi no klarar å demma opp ein stor del av omsetnaden av det farlege stoffet, seier Hadler-Olsen.

Mannen som er mistenkt for produksjon og omsetnad av narkotika er ein kjenning av politiet i Bergen.