Lokal | 30. des. 2016

Då Jon blei ramma av kreft fekk han uventa støtte

Osingen Jon Stigen blei hasteinnlagt på sjukehus i England før jul.

Då Jon blei ramma av kreft fekk han uventa støtte
Jon Stigen (t.v.) mista raskt hår og skjegg då behandlinga starta. Då gjekk lagkameratane på pub og klipte seg skalla. (Privat foto)
Kjetil Vasby Bruarøy
Kjetil Vasby Bruarøyfredag 30. des. 2016 18:55

Bildeserie:

Rundt 20 lagkameratar barberte hovudet då Jon blei sjuk.
Rundt 20 lagkameratar barberte hovudet då Jon blei sjuk.
Kameratar og familie samla på puben.
Kameratar og familie samla på puben.
Jon er takksam for støtta - og for at han fekk feira norsk jul heime i Southampton.
Jon er takksam for støtta - og for at han fekk feira norsk jul heime i Southampton.
1 av 3
Rundt 20 lagkameratar barberte hovudet då Jon blei sjuk.
Kameratar og familie samla på puben.
Jon er takksam for støtta - og for at han fekk feira norsk jul heime i Southampton.

Jon Stigen (25) frå Os studerer maritime business (shipping) på Solent Southampton University, og er midtvegs i andre år av den treårige bachelorgraden. På fritida speler han amerikansk fotball på universitetslaget «Solent Redhawks».

Då Jon i november fekk smerter i rygg og mage, i tillegg til problem med pusten, oppsøkte han lege.

– Eg var heime i Os ein tur og var på legevakta i Os. Dei fann ikkje ut kva det var, men då eg var tilbake i England, og blei utmatta av det som normalt er oppvarming, gjekk eg til lege på nytt, fortel Jon.

Då blei han sendt rett på sjukehus for behandling av kreft, og Jon har, med unntak av permisjon julaftan, blitt liggande på sjukehus i heile desember for behandling.

Brydde seg ikkje om treff på Google

Det viste seg at Jon har testikkelkreft som hadde spreidd seg til fleire delar av kroppen, blant anna lungene. Han har òg ein svulst som pressa på lymfeknutar, som igjen skapte smertene i rygg og mage.

– Eg blei i hovudsak overraska då eg fekk diagnosen. Eg hadde aldri sett for meg at smertene eg hadde var relatert til kreft. Eg hadde naturlegvis Googla symptoma mine i aust og vest, og same kva du googlar på så kjem kreft opp som alternativ, men eg trudde ikkje det kunne vera det.

Samtidig blei Jon litt glad og følte seg heldig, ut frå slik situasjonen var.

– Sjølv om kreften har spreidd seg mykje så er cellegift svært effektivt på testikkelkreft, 98 prosent av dei som blir ramma klarer seg. Det var godt å høyra.

At dette kunne vore oppdaga veka før, heime i Os, er ikkje noko han klandrar nokon for.

– Symptoma mine var diffuse og det er gjerne ikkje noko helsepersonell heller vil assosiera med kreft. Men det viser seg jo at det kan vera verdt å ta ein blodprøve når du er usikker. Det var det dei gjorde i England, noko som raskt peikte dei i rett retning når det kom til det å stilla diagnose.

Med ballar for kreft

Jon fortel om svært godt miljø og samhald på universitetslaget, og då «Turtlestrong», som han blir kalla, hamna på sjukehus, var lagkameratane raske med å koma støttande til.

Først starta dei ein innsamlingsaksjon til organisasjonen «Balls to Cancer», som jobbar med å «raise awareness of male type cancers to end the taboo of talking about cancer».

Så gjekk dei på puben og klipte seg skalla. I sympati med Jon, som mista hår og skjegg då behandlinga starta.

– Venane mine på laget har vore ei enorm støtte for meg, både gjennom samtalar på telefon og besøk på sjukehuset. Mange av gutane har omtrent blitt som ein familie for meg.

– At dei i tillegg har engasjert seg og samla inn pengar til denne organisasjonen, eg trur dei er oppe i rundt 30.000 kroner no, og at dei tok ein sporty fellesklipp på puben, er både oppmuntrande og fint i ei elles litt tung tid.

Fridde frå sjukesenga

Familien til Jon var ikkje seine med å koma til England for å støtta Jon dei heller. Samtidig hadde han kjærasten Sunniva Helene Palmork hos seg heile tida. Dei to bur og studerer saman i Southampton.

– Eg hadde plan om å fri til Sunniva til våren, men diagnosen stokkar litt om på tankane og prioriteringane dine, seier Stigen.

Han køyrde tradisjonell stil med å spørja svigerfar først, og då han meinte at det var meir enn OK starta jobben med å smugla ein ring inn på sjukehuset.

– Eg klarte dessverre ikkje å gå ned på kne, eg måtte ta det frå senga. Derfor blei det meir fokus på ord enn handling. Eg var i grunnen ikkje så spent på svaret, Sunniva har alltid, og spesielt i denne tida eg har vore sjuk, vist at ho bryr seg. Ho sov med meg på sjukehuset heile den første veka og passar heile tida på at eg har det bra.

Operasjon, overvaking og behandling

Ei veke eter at han blei innlagt blei Jon operert i ryggen for å letta presset på nervene. Så fekk han komplikasjoner med lungene og blei lagt til overvaking på akutten.

– Dette var kanskje den vanskelegaste tida, då tilstanden var kritisk. Heldigvis var både Sunniva og familien hos meg, det har gjort at det ikkje har vore så vanskeleg å vera «stucked» på eit sjukehus i utlandet.

I starten var legen uroleg for korleis Jon ville reagera på cellegifta, då hormonnivåa (HCG) var høge.

– Hos friske skal desse ligga på 5, dei med «moderat» kreft ligg gjerne på rundt 200.000 mens eg hadde 800.000. I tillegg var det komplikajsoner med rygg og lunger.

Komplikasjon med ryggen gjer at Jon har problem med å gå. Han veit heller ikkje kor lang tid rehabiliteringa vil ta.

– Men det går sakte på fram. Hormonnivået var på førre måling nede i 27.000 og eg har framgang med rygg og bein. Det er ganske surrealistisk å spela kamp den eine månaden og ikkje å kunna gå den neste, men alt i alt er eg takksam for all god støtte frå familie, svigerfamilie, forlovede og lagkameratar, for at eg fekk permisjon på julaftan, med pinnekjøtt og det som høyrer med i norsk julefeiring, og for at alt ser ut til å gå rett veg, seier Jon Stigen.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.