– Den gjekk rett i hjarta våre

Bildeserie:

1 av 3

17. maikomiteen i Os kommune inviterte alle femte klassingane i Os til å bidra med teikningar til årets 17. maiprogram. Totalt fekk dei inn 208 teikningar.

– Juryen hadde i år, som tidlegare eit særs vanskeleg val.

– Men teikninga frå Linea stakk seg tidleg ut.

– Den var heilt annerleis enn det vi har sett før, fortalde Kjetil Osablod Grønnvigh då vinnarbidraget skulle offentleggjerast på ei pressekonferanse tysdag.

Skal vera annerleis

Nettopp det at teikninga skilte seg ut som noko nytt og annerleis falt juryen for.

– Programmet på sjølve 17. mai blir vel òg litt annerleis i år enn tidlegare.

– Vi freister å utfordra oss sjølv, både når det kjem til talane og dei kulturelle innslaga.

– Difor er denne teikninga heilt i tråd med det vi freister å gjera med årets 17. maifeiring på Kyrkjeflaten.

– Den gjekk rett i hjarta våre og det var ein einstemmig jury.

– Fortsett sånn, supplerte Bente Borghild Hauge.

Programmet blir i løpet av få dagar trykt opp i 7000 eksemplarar og distribuert i postkassane i byrjinga av mai.

– Gjekk litt tid

Kunstnaren sjølv fortel at ho brukte litt tid på å koma på kva ho skulle teikna.

– Eg brukte vel ein time på å få den ferdig.

– Men det gjekk litt lang tid før eg fann ut kva eg skulle teikne, fortel Linea, som røper at ho tykkjer det er gøy å teikna, men at ho ikkje gjer det så mykje.

Utstilling i sentrum

Etter høgtidleg overrekking av blomer, premie og diplom til vinnaren kunne Osablod Grønvigh røpa at alle bidraga vil bli stilt ut.

– Alle dei 208 teikningane vil, tradisjonen tru, bli stilt ut i sentrum fram mot 17. mai.

– Vi har ikkje heilt klart kor det blir enno, men det blir, så folk kan få sjå alle dei flotte bidraga.