Dobla deltaking opp Langedalen!

Bildeserie:

1 av 8

Søndag blei Langedalen Opp arrangert for tredje år på rad.

Deltakartalet gjekk frå 2012 til 2013 ned frå 145 til 100, men i år blei det rekord med god margin.

– Vi har marknadsført løpet litt betre i år, og hadde håpa på, om vêret var bra, at vi skulle koma oppunder 200 deltakarar.

– Skodda letta, vêret blei bra og vi hadde til saman 203 deltakarar, fortel ein nøgd Andreas Søfteland frå STIL.

Auke i både tur- og konkurranseklasse

– Det blei som vi hadde venta og håpa på, at vi fekk endå fleire ungar og familiar med.

I 2012 og 2013 var det 63 og 50 i konkurranseklassen, i år var det rekordmange 70 deltakarar i konkurranseklassen, 12 i kort løype, 58 i lang løype.

Men det var i turklassen det auka mest, frå 50 i fjor til 133 i år.

Sperra løypa med lastebil

Dei som konkurrerte i lang løype måtte springa 55 meter lengre enn tidlegare år.

– Det var ein grunneigar som hadde parkert ein lastebil i løypa. Vi fekk dessverre ikkje flytta den, så vi måtte laga ein omveg og rekna ut kor mange sekund dei 55 ekstra meterane skulle utgjera, for å veta kva som eventuelt skulle bli akseptert som ny løyperekord.

Tett spurt og ny rekord

I herreklassen (lang løype) blei det same vinnar som i fjor, Espen Roll Karlsen frå BFG Bergen. Han kom i mål på 07:09, to sekund bak fjoråret, som òg var ny rekord, trass i at løypa var 55 meter lengre i år.

Roll Karlsen fekk følgje til døra av Erik Hovlandsdal frå Norna Salhus, mens Robert Bergstå, som tok 2. plass i fjor, hamna på 3. plass i år.

Sjå heile resultatlista i høgre marg (bildefil).

Brørne Vegard og Håvard Austevoll frå Kalandseid kom på 4. og 5. plass, mens Trond Inge Nilsen, Øyvind Odland og Walter Midtsæter frå Os kom på 10., 11. og 12. plass.

Målfrid på 3. plass

I dameklassen blei det siger til Ingrid Tunestvedt frå Kongshaug, som sprang på 09:25, mens Solveig Sandvik Tveiten tok 2. plass 20 sekund bak.

Friidrettsutøvar Målfrid Pettersen Lunde (Fana IL) frå Os kom i mål på 09:59 og tok 3. plassen.

Kort løype hadde 12 deltakarar, 2 jenter og 10 gutar.

Linnea Sælen var raskaste jente med tida 08:28, mens dette var dei tre raskaste gutane i kort løype:

1. Lasse Styrvoll 07:29
2. Noah Lyssand Hodneland 08:17
3. Isak Sælen 08:31