Dommar reagerer på omtale - trenar reagerer på avgjerd

Bildeserie:

1 av 9

Laurdag spelte Lysekloster 1-1 i toppkamp mot Varegg. Varegg leia før Lysekloster utlikna, i ein omgang der vertane hadde mykje å by på, og fekk ei skåring annulert.

I videoen og bildeserien over er situasjonen der målet blei annulert.

Dommar Kristoffer Hagenes har i etterkant tatt kontakt med Midtsiden og vore kritisk til at han ikkje fekk uttala seg i saka vi la ut etter kampen. Han sa han heller ikkje hadde fått sjå videoen som Lysekloster seier tydeleg viser at det ikkje var offside.

At trenarar etter kamp nemner at dei tviler på ei avgjerd, om avgjerda ikkje var avgjerande, utløyser ikkje nødvendigvis at vi ser behov for å ringa dommar for å grava djupare i saka. Vi har òg opplevd at dommarar kan vera vanskelege å nå på ein laurdagskveld etter kamp.

Men i dette tilfellet tar vi sjølvkritikk. Målet ville vore avgjerande og vinklinga på saka vår var nettopp kritikk til dommaren.

Hagenes dømmer også i Eliteserien, og driv dommarutvikling i Hordaland fotballkrets. Han vil òg forklara korleis han vurderte situasjonen med den annulerte skåringa.

– Ville dømt offside uansett

Verken linjemann eller hovuddommar markerte for offside etter avgjerda. Varegg-spelarar ropte «offside» og nemnte at «keeper er linja». Då det sto ein utespelar bak keeper blei keeper bakerste mann.

– Det einaste eg spurde linjemann om var om han sto på keeper eller om han sto på forsvarsspelaren til Varegg. «Om keeper var linja var det offside», var hans klare svar.

– Om dette var ein kamp lengre nede i divisjonane, at eg ikkje hadde hatt linjemann, ville eg ikkje ha stussa på å dømma offside.

– Soleklar feil avgjerd

Hos Lysekloster fnyser dei først av at dommar har sagt at han ikkje fekk sjå videoen. Den hadde dei nemleg, uoppfordra, sendt til dommar etter kamp.

– Vi bruker video for å forbetra oss. Eg håper også dommerstanden ønskjer å forbetra seg, derfor sendte vi videoen, seier Lysekloster-trenar Ruben Hetlevik.

I dag viser det seg at videoen, grunna at avsendar hadde skrive dommaren si epostadresse feil, likevel ikkje var sendt.

– Eg vil ikkje skulda på dommaravgjerder etter kamp, men ser videoen for å analysera kva vi kunne gjort betre og annleis for å skåra fleire mål når vi dominerer sånn som vi gjer.

– Men etter å ha sett videoen, og fleire av situasjonane opp igjen, har eg inntrykk av at fleire avgjerande situasjonar er dømt heilt feil.

– I tillegg til at det er tre, kanskje fire, faktorar som opphever offside i situasjonen der målet blei annulert, skulle det heilt klart vore dømt hands i situasjonen før Moldeklev blei utvist.

Moldklev felte ein motspelar for å stoppa ei kontring, ei kontring som var mogleg etter at ein Varegg-spelar var borti ballen med handa.

– «Når ballen sprett opp frå bakken er det ufrivillig», sa dommaren. Ballen kom ned frå 25 meter og ville ha pakka opp i ein hovudduell om ikkje Varegg-spelaren hadde dempa den med handa og sentra vidare, meiner Hetlevik.

Oppdatert: Dommar er einig

Midtsiden har fått svar på epost til dommar Hagenes, som no har endra meining.

– Ut i frå tilsendte videobilde som vi fekk tilsendt i dag, er det klart at Lysekloster sin nr 14, som vi dømmer offside på, blir feilvurdert frå vår side.

– Frå vår posisjon på banen hadde vi ei oppfatning av at dette var offside, men vi ser no at vi feilvurderte situasjonen, skriv Hagenes i ei melding til Midtsiden.