Duppa i bølgjene

Torsdag ettermiddag fekk Midtsiden tips om at det låg ein ubåt i området utanfor Osøyro. Kvifor den låg der var ikkje lett å skjønna ut frå aktiviteten. Den såg heller åleine ut der den låg som ein dupp på bølgjene vest for Sandholmane.

- Det var ikkje noko meir enn at dei var ute for å kalibrera utstyr, fortel Thomas Gjesdal, pressetalsmann i sjøforsvaret.

Gjesdal fortel at Bjørnefjorden er eit av sjøforsvaret sine faste øvingsområder.

- Ein vil difor frå tid til anna oppleve forskjellige marinefarty i og på fjorden, seier han.

Det er ikkje første gang Bjørnefjorden blir nytta til øvingsområde for ubåtar og marinefarty.

Under andre verdskrig hadde dei tyske styrkene mellom anna ei ubåtbase i Hatvika og nytta Bjørnefjorden til øvingar.

På ubaatkrig.no kan vi lesa at tyskerane dreiv anti-ubåtøvingar i Bjørnefjorden med norske, hollanske og franske ubåtar dei hadde tatt under krigen som øvingsobjekt.