E39 blir nattestengd

Statens Vegvesen melder at dei frå onsdag kveld 24. august vil stengje E39 i tre netter.

Vegen vil bli stengd frå klokka 22 til 06 onsdag, torsdag og fredag denne veka.

Grunnen til stenginga er at arbeidet med å legga den 600 meter lange ny vassledningsgrøfta, som ein har jobba med sidan i mai, går inn i siste fase.

– Vassledningen skal kryssa E39. Når dette pågår kan det ikkje vera trafikk på vegen og vegen bil difor stengd dei tre nettene. Omkøyring er via fv. 552 om Osøyro, fortel Geir Brekke, kommunikasjonsrådgjevar i Statens Vegvesen.

Fartshumpane hjalp

I starten av arbeidet hadde Statens Vegvesen utfordringar med at bilistane ikkje held den reduserte fartsgrensa forbi anleggsområdet.

– Etter fleire politikontrollar, fartsvisningstavle og etablering av fleire fartshumpar, har trafikantane synt meir omsyn til anleggsarbeidet forbi byggeplassen, fortel Brekke.

Vassgrøfta er mellom tre og fem meter djup. Det har òg vore mykje spreningsarbeid i byggjeperioden.

Etter planen skal E39 opna i begge retningar igjen 4. september.