– Eg blei lattermild og sjokka

Ein mann frå Os fekk nyleg post frå eit selskap han var kunde hos for mange år sidan.

– «Denne må du sjå», sa kona då eg kom heim. Eg blei lattermild, men samtidig sjokkert.

Ved namnet hans på den adresserte reklameposten sto skildringa «Ufin og vanskeleg».

– Eg reknar med at dette ikkje var bevisst frå avsendar, men eg synest jo det er spesielt både å notera denne form for eigenskap og å senda det heim til kunden.

Veit kvifor

Sjølv om det er lenge sidan han var kunde hos selskapet så har han ein mistanke om kvifor han har fått den lite flatterande skildringa.

– Det var for drygt 10 år sidan. Vi heldt på med oppussing av eit våtrom og var ikkje nøgd med korleis dei følgte opp prosjektet.

Den aktuelle butikken låg på Midttun og er no nedlagt.

– Eg hugsar ikkje detaljane, men det endte med at eg terminerte samarbeidet og sa samtidig kva eg meinte om innsatsen deira.

Ber om orsak

Reklamebrevet handla om fusjon mellom nokre rørleggarbedrifter i Bergen.

– Vi sit på kunderegister frå fleire med felles eigarskap. Sjølv om notatet ikkje stammar frå våre butikkar, men ein nedlagt butikk, vil eg på vegne av kjeden be om orsak, seier dagleg leiar for dei to Unik-butikkane som står bak utsendinga, Kjell Stunner.

– I forkant av utsendinga hyrte vi inn eit byrå for vask av kunderegisteret vårt, men av 10.500 utsendte brev har 1000-1200 kome i retur grunna feil adresse.

– I tillegg har vi fått nokre klagar. Det gjeld ikkje i denne kategorien her, men frå pårørande av tidlegare kundar som no er død.

– Har det vore vanleg praksis å notera personlege trekk hos kunden?

– Nei. For å hindra at kundar med inkassosak hos oss går og handlar i andre butikkar i kjeden på kreditt, har vi hos nokre få personar notert «inkasso» bak namnet. Men eg har aldri sett at nokon har hatt denne typen karakteristikk ved namnet sitt.

– Hadde eg sett det så hadde eg sletta det. Dette høyrer ikkje heime i eit kunderegister, seier Stunner.