– Eg trudde alt håp var ute

Elias Grimstad Salbu (18) frå Os er som kjent ein av deltakarane i årets The Voice på TV2.

Etter sesongstart i går viste TV2 i kveld runden der Elias song for mentorane; Morten Harket, Lene Marlin, Yosef Wolde-Mariam og Martin Danielle.

18-åringen frå Os, som er elev ved Kongshaug Musikkgymnas, song på norsk, «Riv i hjertet» av Sondre Justad.

– Eg var veldig nervøs og det blei ikkje betre av at dei aldri snudde seg, seier Elias.

På førehand hadde han håpa å få Morten eller Yosef som mentor, men om ingen snur seg er du heller ikkje vidare.

Mentorane sat med ryggen til og såg både nysgjerrige og nøgde ut, men først på tampen av siste strofe høyrde vi lyden av at nokon pressa inn knappen så mentor-stolen snudde seg.

Elias er vidare og får Morten Harket som mentor!

• På TV2.no kan du sjå Elias si framføring

– Eg trudde alt håp var ute, og blei utruleg overraska og glad då Morten snudde seg, seier Elias til Midtsiden etter sending i kveld.

Han har måtta halda resultatet frå audition i april for seg sjølv og såg sendinga saman med «120» medelevar i éin sofa.

– Det var ein stor gjeng som hadde samla seg i eit fellesrom, men der fekk vi ikkje sendinga til å fungera. Rett før det starta sprang vi inn på eit lite rom med TV, og der blei vi sitjande svært tett.

Steninga var god og no kan Elias og venane på Kongshaug gle seg til sending av dei neste rundane før han, om han har gått vidare, skal til livesending der osingane og fans frå andre stadar kan stemma han vidare.