Elevar i nasjonalbåt

Laurdag er det Oselvarfestivalen, i dag fekk elevar frå Nore Neset oppleva Oselvardagen.

Historietime, styrbord- og babord-årer, knutar og stikk, i dag var det 9A ved Nore Neset skule sin til til å få teoretisk og praktisk kunnskap om nasjonalbåten oselvar.

SJÅ VIDEO NEDST I ARTIKKELEN

- To av dei første vekene i skuleåret går med til å ta imot niandeklassingane frå ungdomsskulane i Os, fortel Hallgeir Bjørnevik frå Oselvarlaget.

- Dette har vore fast innslag for dei rundt 250 niandeklassingane i Os i cirka 10 år. Det er fint å vera med på å vidareføra litt kunnskap om oselvaren og den generelle båttradisjonen som er ein så viktig del av identiteten til mange osingar.

Lurte ikkje elevane
Båtbyggar Bjørnevik brukte både eventyrforteljing og lurespørsmål då han delte kunnskapen sin med elevane.

«Kva type plast er oselvaren bygd av?» og «kor lange nåler er det på eik, som kjølen på oselvaren er bygd av?». Ingen beit på, elevane var tydelegvis førebudde.

- Vi har laga eit hefte som skulane har fått så elevane lærer litt om oselvaren på førehand.

Kjekt å knyta
Etter å ha høyrt om historia til oselvaren og fått litt praktisk innføring blei klassen delt i to. Medan nokre var ute og rodde og segla var resten inne for å læra om knutar.

- Ei jente frå Søfteland har den uoffisielle verdsrekorden i å knyta pålestikk, den er på 1,8 sekund, fortalte Hallgeir.

- Det er litt kjedeleg og litt kjekt. Å læra om knutar er ineteressant, synes Kristoffer Røttingen Skår.

Aurora Forstrønen og venninnene var veldig engasjerte med tauet.

- Dette var gøy, seier dei, før Hallgeir roper «klar-ferdig-gå».

Jentene var raskast med pålestikket, men ikkje alle fekk knuten sin godkjent.

«Pass på så ikkje det blir kjerringknute», åtvara Bjørnevik.

VIDEO: Sjå film frå Oselvardagen. (Foto: Kjetil Vasby Bruarøy)