Enkel start for Søre Neset

Bildeserie:

1 av 10

Eriksen var spent på kva lag han og jentene kom til å møta då dei tok i mot BSI 3 i Oshallen måndag kveld.

– Elitelaget til BSI måtte jo trekja seg grunna økonomi, så eg var litt spent på om det var nokre av spelarane med høgre divisjonserfaring som no kom til å vera med mot oss i 3. divisjon.

– No viste det seg at den uroa var ubegrunna, og vi fekk ei grei gjennomkøyring, seier Morten Eriksen etter at Søre Neset hadde vunne tre strake sett 25-12, 25-15 og 25-14.

Fekk ikkje vist seg

Samstundes som trenaren er nøgd med at dei fekk ein mjuk start på serien, skulle han ha ønska litt tøffere motstand.

– Vi har ein tøff kamp mot Kvernbit torsdag. Eg kunne difor ha ønska at vi hadde fått det litt tøffare, slik at vi hadde fått testa oss meir.

– Eg føler vi ikkje fekk vist kva vi kan, og saknar litt meir trøkk, oppsummerar Eriksen.

Godt publikumsframmøte

Volleyball er ikkje av dei største idrettane i osbygda. Eriksen er difor svært nøgd med at heile 25 tilskodarar fann vegen til Oshallen.

– Det er veldig kjekt.

– Eg håpar dei tykkja det var såpass gøy at dei tek turen igjen, når vi tek imot Hordvik i neste heimekamp den 4. november.

Samarbeider med Strandvik

Søre Neset-laget er relativt nykomponert, og eit resultat av samarbeidet med Strandvik IL frå Fusa.

– Vi har teikna ei overbyggingsavtale med dei, slik at jentene derfrå kan spela U19 med Strandvik og senior-volleyball med oss.

– At vi dreg nytte av samarbeidet er det ikkje tvil om. Otelie Tuft og Elin Sundvor frå Fusa er to gode spelarar. Mot BSI 3 var spesielt Otelie rå i angrep.

– Eg har òg lyst å trekka fram Jeanette Strandenes, Vibek Thuen og Rebekka Bjørnarøy som alle har spelt aktivt berre i eitt år. Dei sto fram når det gjaldt mot BSI, avsluttar Eriksen.