Er det snart vår i lufta?

Mars har vore kaldare og tørrare enn normalt, i Bergen har temperaturen i snitt lagt på 0,8 gradar, som er 2,5 gradar kaldere enn normalt (frå 1961 til i dag). Det har kome 73 millimeter nedbør i Bergen, noko som er under halvparten av normalen for mars, melder BT.no.

April starta rekordkaldt med 5,3 minus målt på vêrstasjonen Florida i Bergen, men no kjem våren i Sør-Noreg, fortel NRK Hordaland.

Dei legg til definisjonen på vår:

«Den klimatologiske definisjonen på vår er når døgnmiddeltemperaturen er over null og under ti gradar, og temperaturen er stigande.»

8 gradar og sol i Os

Temperaturar mellom null og 10 gradar høyrest like mykje ut som typisk juleferie i Os, men vi vil likevel tru at 8 gradar og sol vil skapa vårstemning i hage og på fjorden rundt i Osbygda.

Det er nemleg meldt 6 gradar og sol søndag. Måndag om ei veke er det venta skyfri himmel og 8 gradar.

Men først må vi tola nokre netter med kuldegradar og nokre dagar med regn.

I dag, 2. påskedag, er Yr og Storm samde om lettskya vêr på dagtid og 1-3 minusgradar natt til tysdag. Tysdag kveld er det venta temperatur rundt 0 gradar og nedbør i form av sludd eller snø.

Onsdag og torsdag er det meldt 4-6 varmegradar og regn.

Yr melder lettskya fredag og overskya, men opphaldsvêr mesteparten av laurdag, Storm melder regn både fredag og laurdag.

Sjå detaljert vêrvarsel for Osøyro, frå Yr og Storm side om side, på Pent.no.