Får stell og pleie

Bildeserie:

1 av 5

Tysdag ettermiddag blei knoppsvanehannen i Oselvo funnen med ope brot i foten, liggande nær reiret på austbredden av Oselvo.

Os kommune sponsar nødvendig veterinærhjelp og onsdag blei «Hamnesjefen» operert ved Osøyro Dyreklinikk.

Veterinær Eva-Kristin Lunde var ikkje optimist etter operasjonen, men etter inspeksjon fredag kveld ser det lysare ut.

– Det som er mest spennande no er om antibiotikaen fungerer, at han unngår infeksjon, det kan vera farleg for han.

– No har vi hatt av bandasjen og såra ser forbausande bra ut, seier Lunde.

Foten har no fått ein stivare bandasje og får tilsyn gjennom helga.

Får pleie på kaien

To frivillige privatpersonar, Gro Fjeldtvedt og svanebokforfattar Sølvi Bugge, har tatt med seg svana til eit skur på ein kai på motsett side av reiret. For å avlasta dyreklinikken.

– Gro bur her og eg jobbar i etasjen over, seier Sølvi.

– Vi ser til han morgon og kveld, og nesten annakvar time gjennom dagen, men utan å uroa han for mykje.

Brød er bra, men «sjukepleiarane» har prøvd å få i han noko meir næringsrikt.

– Vi har fått noko hønsefôr, men det var han ikkje så interessert i. Men han får i seg mykje gras, heldigvis.