Fekk basseng i kjellaren

Bildeserie:

1 av 1

Dei siste dagane har det ekstreme regnvêret forårsaka flom fleire stadar på Vestlandet, osingane har i det store og heile vore heldig og sleppt unna.

– Eg var ute og følgte med på elva då det stod på, men ho var ikkje i nærleiken av kanten, fortel Heimdal.

Sidan vasstanden etterkvart var på veg ned så uroa ikkje Heimdal seg over butikken i Byvegen.

– Kor kjem det i frå?

Overraskinga var difor stor då han torsdag kom på jobb på Lilleballong og trampa rett ut i eit basseng i kjellaren.

– Det må ha skjedd i går kveld eller i løpet av natta og det er berre i eine delen av kjellaren der vi har lager.

– Eg forstår ikkje kor det kjem i frå, om det er grunnvatn eller noko anna, seier Heimdal, som midt i førebuingane til Halloween fekk det enda travlare.

Heimdal og kona Olaug har fått ut alt som kunne reddast.

– Heldigvis hadde vi ei stor opprydding for nokre veker sidan der mesteparten av varene blei flytta opp i høgda.

– Vatn er vatn

Det var noko papirartiklar som stod i ein kasse på golvet som fekk unngjelda, men det skal ikkje vera mykje som er øydelagt.

– Det er ikkje vits i å erge seg over det, vatn er vatn og det er ikkje noko å gjera med det, seier han og trekker på skuldrene.

– Eg er berre glad for at det har gjort så lite skade, så får vi berre ta jobben med å få vatnet vekk.