Søndag kveld og natt til måndag blei det tomt for diesel hos Circle K og Best. Dette bildet er frå 2. juledag 2016, med noko lågare prisar enn i dag. (Foto: KVB)

Fleire stasjonar tomme for diesel

Låge prisar og manglande påfyll søndag kveld fører til ei aldri så lita krise for minst to stasjonar i Os.

Av: Kjetil Vasby Bruarøy

– Det er tomt for diesel på Cirle K og Best. På Uno X er det lang kø, så no prøver eg meg på Esso, skriv ein Midtsiden-tipsar i ei melding til redaksjonen.

(Tips Midtsiden på 97975200/tips@midtsiden.no)

Hos Best-stasjonen stadfestar dei problemet.

– Det var tomt for diesel då vi kom på jobb klokka 5.30 i dag. Årsaka skal vera at ein sjåfør blei sjuk, fortel Kari Midland hos Best.

– Vi reknar med at leverandøren skaffar ny sjåfør, at vi får påfyll i kveld.

– Får ringverknadar

Nils Øyvind Eidsvik hos Circle K fortel at dei gjekk tom søndag kveld.

– Vi skulle fått påfyll i går, men sjåføren blei brått sjuk mellom Mongstad og Os, og måtte setja bilen frå seg.

Prisane har gått ned under 13 kroner for bensin og under 12 kroner for diesel.

– Med låge prisar i helga gjekk det unna med drivstoff, men no minkar det også på bensinen. Den eine tanken blei nettopp tom, den andre har vi berre 1000 liter igjen på.

Circle K har fått lov å prisa ned «super-dieselen» Miles Plus, der har dei førebels litt igjen.

– Det vil nok få ringverknadar at to stasjonar er tom. Sist Esso var tom så gjekk det ikkje lang tid før også vi fekk tømt tankane våre, seier Eidsvik.