Fleire store straumbrot i Os

Tysdag klokka 21.20 mista fleire bustadar i Søre Øyane straumen.

– Det har gått ut sms til alle abonnentar som er utan straum. I alt er det 1068 som mista straumen, seier kommunikasjonsrådgjevar Øystein Økland i BKK Nett til Midtsiden.

I oppdatert kart har talet stige til nesten 3.500, om lag halvparten av bustadane i Os.

Det er 2.285 hus på Søfteland, i Lysefjorden og på Drange som er utan straum, 686 i Os aust (Hegglandsdalen, Hatvik med meir) og 439 bustadar i Øyane.

Os sentrum, Kuvågen, Søre Neset og Varåsen er blant områda som har styrt klar.

OPPDATERT kl 21.58:

– Det starta med ein høgspentfeil i stasjonen som forsyner Øyane med straum, så kom det ein feil i Os stasjon, på linjene mot Lysefjorden, Søfteland og Os aust, fortel Økland.

– Årsaka til høgspentfeilen kjenner vi førebels ikkje, men vi har mannskap på stasjonane. Dei jobbar på spreng med feilretting.

Økland veit ikkje sikkert kor tid abonnentane vil få straumen tilbake. Førebels er det notert venta innkopling klokka 00.30.

kl 22.08: MF Fosen kansellerer avgang 21.50 frå Hatvik og 22.05 frå Venjaneset grunna straumbrotet.

kl 22.10: Fleire hus i Øyane, alle utanom 41, har fått straumen tilbake.

kl 22.24: Den totale mengda abonnentar utan straum er no nede i under 1.300 (1.041 i Lysefjorden og på Søfteland, 158 i Os aust og 41 i Øyane).

kl 23.14: Totalt 393 er utan straum, framleis fordelt på tre område.

– Det ligg an til at alle får straumen tilbake om ikkje så lenge, men vi veit ikkje heilt sikkert. Vi driv framleis med feilsøking, seier Økland til Midtsiden klokka 22.14.

Onsdag morgon har alle fått straumen tilbake.