– Folk føler seg lurt

Bildeserie:

1 av 8

I forkant av dagens kommunestyremøte, der Os kommune skal koma med høyringsuttale til Statens vegvesen sin plan for E39 Stord-Os, hadde ein venninnegjeng frå Søre Øyane, der ei eventuell bru vil landa, organisert fakkeltog frå Vognhallen til Os rådhus.

– Vi hadde ikkje tenkt å gjera noko sjølv, vi har halde på i fem år, og trudde engasjementet var vekke. At nokre innbyggarar i Øyane tar dette initiativet, og at oppslutnaden blir så god, er heilt fantastisk, seier leiar i Folkeaksjonen mot bru over Bjørnafjorden, Geir Magne Johnsen Moberg i direktesendt intervju via Midtsiden si Facebook-side før avmarsj i 16.30-tida i dag.

– Eg håper denne markeringa kan få opp igjen engasjementet. Dette er ein protest mot slik lokaldemokratiet vår har handtert saka. Prosjektet har vore underkommunisert frå dag éin, folk føler dei ikkje er høyrd og folk føler seg lurt.

– Dessverre er det berre 17 av 35 som forstår

Etter at fakkeltoget hadde gått ein runde innom eit framleis julepynta Os sentrum, rundt rådhuset, så samla dei seg i ein stor ring nær inngangen på baksida.

«Nei til bru - ingen skam å snu!» ljoma mellom murveggane i fleire minutt før Moberg tok ordet.

– I 2013 sa dei at vi var for tidleg ute med protestane, no seier dei at vi er for seine. I kveld sit det 35 politikarar inne i kommunestyresalen, dessverre ser det ut som om det berre er 17 av dei som forstår kva vi snakkar om.

– Det beste vi kan håpa på er at éin av dei som sit i posisjon (Frp/Høyre) viser at Os kommune bør uttala seg som negativ til rasering av Kobbavågen og Øyane.

• Uttalen frå plan- og bygningsutvalet: Dette er forslaget til uttale dei skal stemma over i kveld