– Folk har vist forståing

Bildeserie:

1 av 5

I slutten av april kom den portugisiske granitten som skal utgjera det nye bygolvet i Os sentrum til bygda. Etter det har steinleggarane frå Svein Boasson AS jobba jamnt og trutt.

– Eg har fått nokre kommentarar på at folk ikkje har syntes at effektiviteten og produktiviteten har vore allverden, men då skal ein hugsa på at vi samstundes med at dei skal legga bygolvet, så skal vi halde sentrum ope.

– Fram til torsdag i neste veke er bydraget stengd for gjennomkøyring, slik at dei får gjort seg ferdig rundt hjørnet på Dragesetbygget og vi får avvikla Tour des Fjords, seier prosjektsjef Tor Inge Døsen.

Tek felt for felt

Etter Tour des Fjord kjem arbeidet til å helda fram på torget framfor blomsterbutikken og vidare bortover mot gamle banken.

– Det blir litt flytting fram og tilbake. Men dei tek felt for felt. Folk er forståelsesfulle. Det gjeld både butikkeigarar, bilistar og fotgjengarar. Det kan kanskje sjå ut som eit virvar når dei held på, men det er erfarne steinleggarar som gjer jobben og dei har oversikten. Alle som er involvert i sentrum har måtte gje litt i sommar, men vi har heldigvis unngått skader og uheldige situasjonar, seier Døsen.

Legg ny infrastruktur

Samstundes med steinlegginga oppå bakken, har Osøyro òg blitt fornya under grunnen.

– Det er eindel grunnarbeid vi tek samstundes. vi jobbar oss både over og under bakken. Det gjer òg at det tek litt tid. Dei raude store røra vi no legg ned på torget skal vi trekke vassledning gjennom seinare fram til fontene vi planlegg.

Held litt att

På grunn av sykkelløpet i neste veke har Døsen gjeve forskalingsarbeiderane som jobbar med Osroso, det nye torgbygget, beskjed om å halde litt att.

– Dei har fått beskjed om å avslutta arbeidet rundt det som er under bakken på Osroso og komma tilbake etter Tour des Fjord. Då kjem det til å bli fullt trøkk også på det prosjektet igjen, avsluttar Døsen.