Folkefest i Øyane

Bildeserie:

1 av 13

I strålande solskinn arrangerer Tommy Aasen og IL Øyglimt Redd Barna Cup for femte året på rad. Blant dei mange frivillige finn vi mor og dotter Ann Kristin og Mari Røttingen som har tatt den sju timer lange turen frå Hønefoss til Søre Øyane for å bidra.

– Eg er jo her frå og når ein ungdom som Tommy drar i gang dette så er det vår plikt som vaksne å stille opp. Dessuten er det jo eit kjempearrangement og kjempeartig, seier Ann Kristin når Midtsiden hukar tak i ho.

– Men likevel, 7 timar i bil kvar veg for å vera med som frivillig?

– He he, vi er jo ein familie som liker å hjelpa til søster mi, mor mi og far min er også med. Det er jo ein gylden anledning til å treffa familien og gamle kjente. Alle er jo her, smiler ho.

– Finst ikkje liknande

Ei som lar seg imponera over innsatsen er Bergit Svenseid frå Redd Barna.

– Det er heilt fantastisk, er den umiddelbare reaksjonen når ho høyrer om dei frivillige frå Hønefoss.

– Vi er utruleg takknemlege for den innsatsen som dei legg ned her ute. Dette betyr utruleg mykje for oss. Det finst ikkje noko liknande ellers i landet. Vi er takknemlege og imponerte over dei som står bak. Vi veit kor mange dugnadstimar som ligg bak, ikkje berre i dag, men i førebuingane også.

– Ein ting er at det samlast inn penger til Redd Barna, men like mykje så er dette ein del av den samarbeidet vi har med idrettslaget, skulen og lokalsamfunnet her ute. Saman skal vi sørgje for at ungane kan driva trygg idrett i eit trygt lokalsamfunn, seier Svenseid.

Heilt fullt

Sportsleg ansvarleg for cupen, Eirik André Hesthamar, fortel om ein fullteikna cup.

– Her er det smikk fullt frå 0840 til klokka 19 i kveld. VI er der no at vi må vurdera å droppe gatecupen for vaksne til neste år fordi det er så mange lag som har lyst å komma ut her.

– I år er dei yngste fødd i 2011. Dei starta dagen med 3ar-fotball. Dei eldste er 2005-årgangen som for anledninga speler 5ar-fotball i staden for 7ar som dei pleier. Alt for å få spela fotball, smiler Hesthamar.