Fotoklubb for unge

I januar i fjor blei Os Fotoklubb etablert. Klubben fekk raskt mange medlemmar, faste møte og eit godt og lærerikt miljø for fotografar på ulike nivå.

Før jul stilte 19 av medlemmane ut over 70 bilde i Oseana, ei flott utstlling der fem bilde blei selt.

– Eg kjøpte speglreflekskamera etter konfirmasjonen, men hadde akkurat byrja å mista litt av fotointeressa. Men så kom klubben med møte og temakveldar, ny kunnskap og spennande erfaringsutveksling – fotointeressa kom tilbake for fullt, fortel Silje Lepsøy.

Vil samla ungdom med kamera

Silje er blant fleire i klubben som trur det er mange ungdomar i Os med fotointeresse, fleire av dei også med eige kamera.

– Utstyret har blitt utruleg mykje betre og billigare med åra, men gleda med å bruka godt fotoutstyr blir så mykje større med litt meir kunnskap.

No vil Os Fotoklubb starta eigen ungdomsavdeling, og yngste medlem Silje (20) blei naturlegvis peika ut som rett medlem til å leia denne avdelinga.

Første møte neste veke

Ungdomsavdelinga av klubben får egne møter der unge fotointeresserte kan få basiskunnskap om fotografering, stilla spørsmål, utveksla erfaringar og prøva ut nye ting.

Fotoklubben held møta sine på Søfteland skule.

– Første møte blir saman med resten av klubben, onsdag 8. februar med oppmøte for ungdomen klokka 19.

– Men seinare kjem vi til å ha eigne møter, anten ein time i forkant av dei vaksne eller på eigne møtedagar.

Aldersgrensa blir ungdomsskulealder.

– Nokre arrangement blir for begge gruppene, som når vi 22. februar får besøk av Audun Nygaard. Nygaard blei kåra til årets fotograf av bladet Fotografi.

På fotovandring

Silje har sans for ulike kategoriar bilde, men trivst for tida best med å ta bilde av folk, gjerne i arrangerte situasjonar.

Det osar fashion av bildet ho tok av venninna Marte Ulltang med ballongar, "Tatt av vinden", eit bilde ho stilte med på ungdomslandslaget då landslaget fekk 2. plass i den internasjonale konkurransen 33th FIAP YOUTH DIGITAL BIENNIAL. Dette er det beste resultatet Noreg nokosinne har hatt i ein internasjonal juniorkonkurranse.

– Sjølv om eg har tatt bilde ei stund og har ansvar for ungdomsavdelinga så er ikkje eg ein ekspert som åleine skal leia ungdomen. Vi skal bli flinkare av å vera saman og få ulike fotografar innom for å fortelja og visa bilde.

– Og så blir det praktisk øving, tema, vising av bildene til kvarandre og eigne fotovandringar, fellesturar utandørs på jakt etter gode motiv med kvar sitt kamera. Når alle er godt i gang vil vi prøva oss i nasjonale og internasjonale fotokonkurransar for juniorar, seier Silje Lepsøy.