Frå fyllekjøring til fengsel

Politiet i Os har tatt to bilistar mistenkt for kjøring i rus det siste døgnet.

Fredag i 13-tida, etter fleire meldingar frå vitne, blei ein mann i 20-åra stoppa rett nord for Os sentrum.

– Han skal ha kjørt veldig vinglete og vore nær på å forårsaka fleire ulykker, seier politiførstebetjent Kenneth Rastad.

Fann GHB i bilen

Vedkomande, ein mann i 20-åra, har ikkje førarkort. Han er no mistenkt for kjøring i rus.

Politiet fann noko dei trur er GHB eller GBL i bilen.

Full førar skulle vore i fengsel

I 19-tida stoppa politiet ein bilist i 20-åra som er meldt for å kjøra bil som ikkje er forsikra.

Frå midnatt til rundt klokka 1 hadde politiet promillekontroll nord for sentrum. Her blei éin meldt for ikkje å ha med førarkort.

I 1-tida blei ein bil stoppa i Lysefjorden av ein annan patrulje.

– Førar, ein mann i 40-åra, hadde høg promille. Då vi sjekka han opp viste det seg at han var etterlyst i samband med soning.

Mannen, som er frå ein annan kommune enn Os, blei kjørt via legevakt til fengsel.