Fryktar testing og press på dei aller yngste

Torsdag kjem forfattar, terapeut og vegleiar Line Melvold til Os for å halda foredrag om «barn, lek og læring».

Melvold er invitert av leiarane i seks private barnehagar i Os.

– Vi har aldri stått så samla før og tida er rett til å seia ifrå, seier barnehageleiarane, som saman fekk ei positiv oppleving av Melvold under eit stort seminar i Bodø i fjor.

– Både foreldre, politikarar og alle som jobbar med born er velkomne. Også dei som har eller jobbar med eldre born vil ha nytte og glede av å høyra på Line Melvold.

Vil unngå dokumentasjon, testing og press

Årsaka til at dei no meiner tida er rett for denne typen seminar er at ny læreplan, som skulle vore ferdig i fjor, ligg på høyring.

Her ligg forslag som barnehageleiarane i Os er kritiske til.

– Det kan nesten sjå ut som om enkelte meiner løysinga på manglande resultat hos ungdomen er å pressa læremåla ned i alder. Denne måten å tenkja på er vi heilt imot.

– Vi driv med både pedagogikk, testing og kartlegging i dag, og dei fleste krinsane i Os har ein veldig god overgang frå barnehage til skule, men vi er redde for at det skal bli for mykje dokumentasjon og eit press på noko vi meiner er altfor unge born.

Trivsel og læring

Melvold gjorde inntrykk på alle barnehageleiarane frå Os og då Stefan frå Borgafjell spurde dei andre om å få foredragshaldaren til Os fekk han god respons.

– To av oss har jo arrangert eit større foredrag i Oseana før, seier Tone Fjeldstad frå Varhaug på vegne av seg og Grethe Nymark Mikkelsen frå Hegglandsdalen barnehage, som i 2014 skipa «Beskyttende faktorer og risikofaktorer i barn og unges liv» med dei to danske familieterapeutane Helle Spanggaard og Søren Westerbjerg

– Vi hadde kjempegodt oppmøte og eit nøgd publikum, no er det kjekt å vera endå fleire saman som arrangør.

Line Melvold skal snakka om korleis barn lærer, kva leik har å seia for læring og korleis foreldre og andre vaksne kan stimulera til utvikling og lærelyst.

– Ungar skal være svoltne på å læra meir når dei kjem på skulen, ikkje mette eller leie av å føle manglande meistring. Noko av det viktigaste vi kan gi ungane er meistrings- og læringsglede og trua på at det vi ikkje kan, det kan vi læra.

– Det er spesielt spennande om mange foreldre kjem. Foreldre til ungar i både barnehage og skular skal ikkje vera redde for å tileigna seg kunnskap eller å seia ifrå, dei treng ikkje berre vera stillteiande og lytta på andre sine argument, men koma med det dei sjølv opplever er rett og gale.

– Vi håper foredraget vekker engasjement og at vi og andre blir høyrd før ny læreplan blir vedtatt.