– Fryktar vi skal få treet i hovudet

Uvêret «Nina» gav for to veker sidan Os og resten av Vestlandet hard medfart. Etter lange dagar med ryddearbeid i etterkant er det framleis enkelte saker som er uoppgjort.

– Treet var ikkje så lett å sjå den første veka etter orkanen, får då hang det høgt oppe. Men eg og nokre kollegaer såg det då vi kjørte til jobb, fortel ein innringar til Midtsiden.

Treet heng over Ulvenvegen FV 160 ved Svegatjørn.

– Etter den tunge snøen kom torsdag ser eg at treet har sige rundt fem meter nærmare vegen. No vågar eg ikkje kjøra under det lenger.

Kom ikkje gjennom til vegvesenet

Innringar fortel at nokre kollegaer har gjort fleire forsøk på å nå gjennom til vegvesenet per telefon, for å varsla om treet.

– No skal det vera sendt ein epost i staden, men det har førebels ikkje skjedd noko. Treet bør fjernast før det ramlar ned og sperrar vegen. Det kan dessutan vera farleg for trafikantane, meiner ho.

Midtsiden har varsla politiet, som fredag kveld rykte ut for å sjekka forholdet og for å kontakta rett instans.