Full fest for Audrey Horne

Bildeserie:

1 av 7

Ei knapp veke før osingen Torkjell "Toschie" Rød og resten av Audrey Horne skulle spela inn musikkvideo sto dei framleis utan både lokale og dei fleste statistane.

Les òg: Lager video på Askviknes

Men så tok kultureininga i Os kommune og resten av Os Rock City tak i saka. Kommunen lånte vekk Askvikneset, Os Rockeklubb og Søfteland Rock N LOL stilte med utstyr og møblar og fekk tak i statistar og personell.

– Skulle vi gjort dette i Bergen ville det aldri blitt det same. Eg er imponert over korleis Osbygda stilte opp, seier regissør Tommy Næss.

Næss med band og mannskap stilte opp på Askviknes klokka 10.30 laurdag. Rundt midnatt var det retur til Bergen. Kvelden i forvegen hadde Kjetil Osablod Grønvigh med delar av rockeklubben kjørt utstyr, laurdagen var han vekke, så då sto festivalsjef på Søfteland Rock N LOL, Andreas Lindborg, i spissen for støtteapparatet.

I tillegg til rockarane og statistane stilte Varde Film og Media med utstyr.

Etter ein dag på betasuppe blei kultursjef Lisbeth Axelsen dagens helt, då ho på kvelden kom utom og spanderte pizza på heile gjengen.

– For mange av statistane blei det ein god fest av denne innspelinga. Men det var ikkje noko problem, dei let seg instruera utan problem, ler regissøren.

Videoen er til låta "Redemption Blues" til albumet "Young Blood", som kjem i hyllene 25. januar.