Gjekk saman over målstreken

Bildeserie:

1 av 2

Osingen Thomas Andersen (41) er den einaste som har deltatt kvart år sidan start i det 100 kilometer lange pulkløpet Expedition Amundsen.

Før løpet som starta torsdag sto han med tre 1. plassar og to 2. plassar på fem løp.

– Første gong var vi berre sju deltakarar. No har Fylkesmannen opna for fleire og i år var vi rundt 200 som starta, fortel Thomas.

Løpet skulle bli hardt, med godt samarbeid mellom dei tre beste, ein tøff og dramatisk innspurt og ein svært kameratsleg målgang.

– Megatryning rett før mål

Thomas og dei to andre i tet gjekk rekordfort mellom sjekkpunkt 1 og 2. Men samla sett var det både dårleg vêr og krevjande føre med mykje laussnø, ifølgje Andersen.

– Vi var tre deltakarar som, etter nokre mil, fekk ei luke til dei andre. Vi skifta på å gå i front og laga spor, men frå siste sjekkpunkt og inn blei det mykje rykk og støt.

Dei siste 3 timane, og spesielt dei siste 30 minutta, gjekk det skikkeleg unna. Då det var éin kilometer igjen så leia Andersen framfor 18 år yngre Lars Christian Vold, som vann i fjor.

– Så velta pulken og eg hadde ei megatryning, fortel Thomas.

Vold suste forbi og Andersen sleit med å koma seg opp og å få festa pulken igjen. Men der sto Vold og venta.

– Han kunne gått i mål før meg, men sa at sidan vi hadde gått så tett, og eg var uheldig, så skulle vi gå over mål saman. Det var utruleg raust gjort, seier ein takksam Thomas.

Har framleis løyperekorden

Dermed kunne Vold ta sin andre 1. plass på rad og Thomas kunne ta sin fjerde 1. plass. Øyvind Lillehagen kom i mål 10 minutt seinare og tok 3. plassen.

– Vinnartida på 22,33 (inkludert 8 timar obligatorsk kvil) kan vi vera nøgd med på det føret, synest Thomas.

Dei to raskaste gjekk med andre ord 100 kilometer med pulk på 14 timar og 33 minutt.

Thomas sin løyperekord på 13 timar og 53 minutt står ved lag.

Hans neste løp går på ski, men utan pulk, 52 km frå Øystese til Voss i slutten av mars.

Les meir om løpet på xtremeidfjord.no.