Hamna nesten i vatnet

Bildeserie:

1 av 4

Omlag klokka 18.20 onsdag ettermiddag køyrde ein bil av vegen på Hetleflåten like nord for Os sentrum. Bilen knakk ein stolpe på vegen og stoppa berre få meter frå vatnet i Skogavika.

Bilen køyrde nordover i retning Bergen. Ulykka skjedde like etter der 70-sona starter frå Os.

– Det har etter forholda gått bra med føraren.

– Han var oppegåande og lite skadd, men blei tatt med til ein sjekk av helsepersonell, fortel vakthavande betjent ved Os lensmannskontor.

Hund stakk

I bilen var det også ein hund.

– Det var berre føraren og hunden i bilen.

– Kor hunden er veit vi førebels ikkje. Den stakk etter ulykka.

Søk etter hunden pågår i området.

Ikkje mistanke om promille

Korleis ulykka skjedde er framleis uvisst.

– Vi veit ikkje meir enn det vi ser på staden.

– Er det mistanke om promille?

– Nei, vi har ikkje mistanker i den retninga, avsluttar politiet.

Politi, brannvesen og ambulanse rykte ut på melding om trafikkuhellet. Trafikken blei raskt dirigert forbi ulykkesstaden.