Hårreisande respons

Det blei folksamt i Symrasalen då revygruppa Nor og ne hadde sine to første framsyningar av årets show, Bru kan flytta fjell.

– Vi fekk kjemperespons av publikum både under og etter framsyningane, fortel Susan Askvik.

– Kva var det folk lo mest av?

– Dei lo av mykje, fleire gongar allereie i det skodespelarane kom inn på scenen. Både tekstar, kostyme og parodiar slo an, enkelte såg på entreen og gangen åleine kven det var vi skulle gjera narr av, ler Susan.

Rekordstort billettsal

150 såg premieren fredag og 190 kom om laurdagen.

– Vi plar setja opp stolar rundt småbord, og då har vi plass til 150. Laurdagen måtte vi ta vekk nokre bord.

Til showet i kveld er det selt heile 176 og laurdag er det venta over 200 på det som blir siste revykveld med Bru kan flytta fjell.

– No har vi for første gong rydda vekk alle bord og sett opp stolar som om det var kinoframsyning.

– Både førre laurdag og i morgon er det dans etter showet, noko som er veldig populært. At vi har så mange også om fredagane er veldig kjekt. Dette er ny rekord for oss, seier Askvik.

Det er framleis rundt 30 ledige stolar til i kveld, men altså berre eit par plassar til siste runde, laurdag kveld.