Heldt følgje i 74 minutt

Os på 4. plass besøkte serieleiar Brann 2 måndag kveld. Brann 2 sto utan tap heime på Nymark og tok også full pott i kveld.

Heimelaget tok leiinga i 74. minutt og auka til 2-0 før slutt.

Brann 2 - Os 2-0 (0-0)
Os: Andrew Todd - Endre Brenne, Adrian Kallekleiv, Divaldo Cardoso, Glenn Krossøy - Rafael Villén, Hassan El Fakiri, Marius Mikkelsen - Erik Kanestrøm, Øystein Takle Eide og Christoffer Hafsås.
Brann 2: Markus Pettersen, Ulrik Edvardsen, Normann Roman, Håvard Foldnes, Viljar Birkeland, David Gjeraker, Gaute Vetti, Vladan Radosjkic, Håkon Gjerstad, Even Vetås og Halldor Stenevik.

Hassan El Fakiri var skuffa då Os tapte 3-4 for Brann 2 på heimebane i vår. Han høyres meir nøgd ut i dag, trass nytt tap.

– I første omgang var det tydeleg at det var to lag som begge ville stå høgt og som øydela spelet for kvarandre. Det blei litt kavete frå begge si side, mange duellar og kamp om andreballen, synest spelande Os-trenar Hassan El Fakiri.

– Vertane skapte ingenting før pause, vi hadde blant anna stolpeskot ved Takle Eide og nokre cornarar. I andre omgang føltes det som om det første laget som skåra ville vinna ballen, for det var ingen av oss som heilt fekk til spelet sitt.

Brann 2 fekk straffe i 74. minutt. Os flytta opp folk for å utlikna, men blei tatt på kontring.

Mot Åsane 2 neste måndag

Os ligg framleis på 4. plass (sjå tabell) med 33 poeng, 5 poeng framfor Bjarg, som har éin kamp mindre spelt.

Brann 2 leiar med 46 poeng og har Sotra 4 poeng bak seg før strilane har spelt 19. runde.

Os speler neste kamp heime mot Åsane 2 måndag om ei veke.